ആറ് വയസുകാരിയെ തട്ടിക്കൊണ്ടുപോയ കേസ്; പോളച്ചിറയിലെ ഫാമില് പ്രതികളെ തെളിവെടുപ്പിനെത്തിച്ചു
Sunday, December 10, 2023 12:12 PM IST
കൊല്ലം: ഓയൂരില്നിന്ന് ആറ് വയസുകാരിയെ തട്ടിക്കൊണ്ടുപോയെന്ന കേസില് തുടര്ച്ചയായ രണ്ടാം ദിവസവും പ്രതികളുമായി തെളിവെടുപ്പ് തുടരുന്നു. പോളച്ചിറയിലെ പ്രതികളുടെ ഫാമിലാണ് ഇന്ന് തെളിവെടുപ്പ് നടക്കുന്നത്.
രാവിലെ 11ഓടെയാണ് അന്വേഷണസംഘം പ്രതികളുമായി ഇവിടെയെത്തിയത്. കുട്ടിയെ തട്ടിക്കൊണ്ട് പോയതിന് ശേഷം പ്രതികള് ഇവിടെയെത്തിയെന്ന് ഫാമിലെ ജീവനക്കാരി മൊഴി നല്കിയിരുന്നു. ഇത് എന്തിനാണെന്ന് വ്യക്തത വരുത്താനാണ് പോലീസ് പ്രതികളെ ഇവിടെയെത്തിച്ചത്.
വ്യാഴാഴ്ച ചാത്തന്നൂരിലെ വീട്ടിലും പ്രതികളുമായി എത്തി അന്വേഷണസംഘം തെളിവെടുപ്പ് നടത്തിയിരുന്നു. രാവിലെ പത്തരയ്ക്ക് ആരംഭിച്ച തെളിവെടുപ്പ് വൈകുന്നേരം മൂന്നിനാണ് പൂർത്തിയായത്.
കുട്ടിയെ തട്ടിക്കൊണ്ടുപോകാന് ഉപയോഗിച്ച സ്വിഫ്റ്റ് ഡിസയര് കാറും ചില നിർണായക ബാങ്ക് രേഖകളും ഇവരുടെ വീട്ടിൽനിന്ന് അന്വേഷണസംഘം കസ്റ്റഡിയിലെടുത്തിരുന്നു.
കുട്ടിയെ ഉപേക്ഷിച്ച ആശ്രാമം മൈതാനം, പ്രതികള് ഒളിവില് താമസിച്ച തമിഴ്നാട്ടിലെ ഫാം ഹൗസ് എന്നിവടങ്ങളിലും തെളിവെടുപ്പ് നടത്തും.