പോലീസുകാരൻ അബദ്ധത്തിൽ വെടിവച്ചു; യുപിയിൽ യുവതിക്ക് ഗുരുതര പരിക്ക്
Friday, December 8, 2023 9:54 PM IST
ലക്നോ: ഉത്തർപ്രദേശിലെ അലിഗഢ് പോലീസ് സ്റ്റേഷിനിൽ സബ് ഇൻസ്പെക്ടറുടെ തോക്കിൽ നിന്ന് അബദ്ധത്തിൽ വെടിയേറ്റ യുവതിയ്ക്ക് ഗുരുതര പരിക്ക്. തലക്ക് വെടിയേറ്റ യുവതി തീവ്രപരിചരണ വിഭാഗത്തിൽ ചികിത്സയിലാണ്.
പാസ്പോർട്ട് വെരിഫിക്കേഷനായി സ്റ്റേഷനിലെത്തിയ ഇസ്രത്ത് എന്ന യുവതിയ്ക്കാണ് വെടിയേറ്റത്. എസ്ഐ മനോജ് ശർമ അബദ്ധത്തിൽ വെടിയുതിർക്കുന്നതും സ്റ്റേഷനിൽ നിന്ന യുവതിയുടെ തലയിൽ ബുള്ളറ്റ് പതിക്കുന്നതും വീഡിയോയിൽ കാണാം.
പാസ്പോർട്ട് വെരിഫിക്കേഷന്റെ ചുമതലയുള്ള ഉദ്യോഗസ്ഥൻ പണത്തിനായി യുവതിയെ ഭീഷണിപ്പെടുത്തിയിരുന്നുവെന്ന് കുടുംബം ആരോപിച്ചു. തർക്കത്തെ തുടർന്നാണ് ഉദ്യോഗസ്ഥൻ വെടിവെച്ചതെന്ന് വീട്ടുകാർ കൂട്ടിച്ചേർത്തു.
മനോജ് ശർമ ഒളിവിലാണ്. ഇയാളെ ജോലിയിൽ നിന്നും സസ്പെൻഡ് ചെയ്തു. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു.