പിണറായിക്കെതിരേ മത്സരിച്ച കോൺഗ്രസ് നേതാവ് പാർട്ടി വിട്ടു
Friday, December 8, 2023 4:39 PM IST
കണ്ണൂർ: ധർമടം മണ്ഡലത്തിൽ 2021-ൽ പിണറായി വിജയനെതിരേ മത്സരിച്ച യുഡിഎഫ് സ്ഥാനാർഥിയും കണ്ണൂർ ഡിസിസി ജനറൽ സെക്രട്ടറിയുമായ സി. രഘുനാഥ് കോൺഗ്രസ് വിട്ടു. ജില്ലയിലെ മുതിർന്ന നേതാക്കളിലൊരാളായ രഘുനാഥ് ഫേസ്ബുക്കിലൂടെയാണ് പാർട്ടിയിൽ നിന്നും രാജിവയ്ക്കുന്നുവെന്ന കാര്യം പരസ്യമാക്കിയത്. രാവിലെ വാർത്താസമ്മേളനം വിളിച്ച് പാർട്ടി വിടുന്ന കാര്യം ഔദ്യോഗികമായി പ്രഖ്യാപിക്കുകയായിരുന്നു.
അഞ്ച് പതിറ്റാണ്ടായുള്ള കോൺഗ്രസ് ബന്ധം ഉപേക്ഷിച്ച് പടിയിറങ്ങുകയാണ്. കോൺഗ്രസിന്റെ ഡിഎൻഎ എല്ലാ അർഥത്തിലും മാറിയിരിക്കുകയാണ്. കഴിഞ്ഞ നിയമസഭാ തെരഞ്ഞെടുപ്പിൽ ഗതികെട്ടാണ് താൻ ധർമടത്ത് യുഡിഎഫ് സ്ഥാനാർഥിയായി മത്സരിച്ചത്. മത്സരിക്കുമ്പോൾ പാർട്ടിയോ മുന്നണിയോ തനിക്ക് ഒരു പിന്തുണയും നൽകിയില്ലെന്നും അദ്ദേഹം കുറ്റപ്പെടുത്തി.
കെപിസിസി അധ്യക്ഷൻ കെ. സുധാകരനുമായി അടുത്ത ബന്ധം പുലർത്തിയിരുന്നു രഘുനാഥ്. എന്നാൽ കഴിഞ്ഞ കുറച്ചുകാലമായി ഇരുവരും അകൽച്ചയിലാണ്. ഇതിനു പിന്നാലെ കണ്ണൂർ ഡിസിസിക്കെതിരെയും നേതാക്കൾക്കെതിരെയും രഘുനാഥ് വിമർശനവും ഉന്നയിച്ചിരുന്നു.
നവകേരള സദസിനെതിരേ ധർമടം മണ്ഡലത്തിൽ യുഡിഎഫ് സംഘടിപ്പിച്ച വിചാരണ സദസിൽ പങ്കെടുക്കാതെ രഘുനാഥ് വിട്ടു നിൽക്കുകയും ചെയ്തിരുന്നു.