വാരിക്കോരിയുള്ള മാര്ക്ക് വിതരണം; പറഞ്ഞത് വ്യക്തിപരമായ അഭിപ്രായമെന്ന് പൊതുവിദ്യാഭ്യാസ ഡയറക്ടര്
Thursday, December 7, 2023 12:26 PM IST
തിരുവനന്തപുരം: പൊതുപരീക്ഷകളില് വാരിക്കോരി എ പ്ലസ് നല്കുന്നതിനെതിരെയുള്ള വിമര്ശനം തന്റെ വ്യക്തിപരമായ അഭിപ്രായമെന്ന് പൊതുവിദ്യാഭ്യാസ ഡയറക്ടര് എസ്.ഷാനവാസ്. സര്ക്കാരിന്റെ നയമോ അഭിപ്രായമോ അല്ല താന് പറഞ്ഞതെന്ന് ഷാനവാസ് വിദ്യാഭ്യാസമന്ത്രിയുടെ ഓഫീസിന് നല്കിയ വിശദീകരണത്തില് പറയുന്നു.
ചോദ്യപേപ്പര് തയാറാക്കുന്നതിനായി ചേര്ന്ന അധ്യാപകരുടെ യോഗത്തില് ചര്ച്ചയ്ക്കിടെയാണ് മാര്ക്ക് വിതരണത്തെ വിമര്ശിച്ച് സംസാരിച്ചതെന്നും ഷാനവാസ് വ്യക്തമാക്കി.
എസ്എസ്എൽസി പരീക്ഷയിൽ വാരിക്കോരി മാർക്ക് നൽകുന്നുവെന്ന പൊതുവിദ്യാഭ്യാസറുടെ ശബ്ദരേഖ പുറത്തുവന്നതോടെയാണ് ഇദ്ദേഹത്തോട് റിപ്പോർട്ട് തേടിയത്. അക്ഷരം കൂട്ടിവായിക്കാനറിയാത്ത വിദ്യാർഥികൾക്കും എ പ്ലസ് കിട്ടുന്നുവെന്നായിരുന്നു വിമർശനം.
എന്നാൽ ഡിജിഇ പറഞ്ഞത് സർക്കാർ അഭിപ്രായം അല്ലെന്ന് വിദ്യാഭ്യാസമന്ത്രി വി.ശിവൻകുട്ടി നേരത്തേ വ്യക്തമാക്കിയിരുന്നു. അധ്യാപക ശില്പശാലകളിലെ രഹസ്യചർച്ചകൾ ചോർത്തി മാധ്യമങ്ങൾക്കു നല്കുന്ന അധ്യാപകരെ കണ്ടെത്താൻ സമഗ്ര അന്വേഷണം നടത്തുമെന്നും മന്ത്രി അറിയിച്ചിരുന്നു.