ഷഹനയെ ഡോ. റുവൈസ് പരസ്യമായി അപമാനിച്ചതായി കേട്ടു, അന്വേഷണം വേണമെന്ന് പഞ്ചായത്ത് അംഗം
Thursday, December 7, 2023 10:35 AM IST
തിരുവനന്തപുരം: ഡോ. റുവൈസ് വിവാഹത്തില്നിന്ന് പിന്മാറിയതോടെ ഷഹന മാനസികമായി തകര്ന്നിരുന്നെന്ന് പഞ്ചായത്ത് അംഗം അഡ്വ. സുധീര് വെഞ്ഞാറമൂട്.
വിവാഹത്തില്നിന്ന് പിന്മാറിയതിന് ശേഷം ഷഹനയെ ഇയാള് പരസ്യമായി അപമാനിച്ചതായി പറഞ്ഞു കേട്ടു. ഇതിന്റെ നിജസ്ഥിതി എന്താണെന്ന് അറിയില്ല. ഇക്കാര്യത്തില് അന്വേഷണം വേണമെന്നും സുധീര് ആവശ്യപ്പെട്ടു.
അതേസമയം സ്ത്രീധനത്തിനായി ഡോ. റുവൈസ് നിരന്തരം സമ്മര്ദം ചെലുത്തിയെന്ന് മരിച്ച ഷഹനയുടെ സഹോദരന് ജാസിം നാസ് ആരോപിച്ചു. കഴിയുന്നത്ര പണം നല്കാമെന്ന് സമ്മതിച്ചിട്ടും റുവൈസ് വഴങ്ങിയില്ല.
റുവൈസിന്റെ പിതാവാണ് സ്ത്രീധനം ആവശ്യപ്പെട്ടത്. അച്ഛനെ ധിക്കരിക്കാനാവില്ലെന്ന് റുവൈസ് പറഞ്ഞു. രജിസ്റ്റര് വിവാഹം നടത്തികൊടുക്കാന് പോലും തങ്ങള് തയാറായിരുന്നു. എന്നാൽ പണമാണ് വലുതെന്ന് റുവൈസ് പറഞ്ഞെന്നും ജാസിം ആരോപിച്ചിരുന്നു.
യുവ ഡോക്ടര് ഷഹനയുടെ ആത്മഹത്യയുമായി ബന്ധപ്പെട്ട് ഇന്ന് രാവിലെയാണ് റുവൈസിനെ പോലീസ് കസ്റ്റഡിയിലെടുത്തത്. ഇയാളെ പോലീസ് ചോദ്യം ചെയ്ത് വരികയാണ്.
ഉയര്ന്ന സ്ത്രീധനം നല്കാത്തതിന്റെ പേരില് വിവാഹാലോചനയില് നിന്ന് പിന്മാറിയതിലെ നിരാശയാണ് ആത്മഹത്യയ്ക്ക് കാരണമെന്ന് ഷഹനയുടെ മാതാവും സഹോദരിയും പോലീസിന് മൊഴി നല്കിയിരുന്നു. ഇതിന്റെ അടിസ്ഥാനത്തിൽ ഇയാള്ക്കെതിരേ പോലീസ് കേസെടുത്തിരുന്നു.
ആത്മഹത്യാപ്രേരണ, സ്ത്രീധന നിരോധന നിയമം എന്നീ ജാമ്യമില്ലാ വകുപ്പുകള് പ്രകാരമാണ് കേസെടുത്തത്.