പിജി ഡോക്ടറുടെ മരണം: ആരോപണവിധേയനായ യുവ ഡോക്ടറെ പ്രതി ചേര്ത്തു
Wednesday, December 6, 2023 11:45 PM IST
തിരുവനന്തപുരം: മെഡിക്കല് കോളജിലെ പിജി ഡോക്ടറുടെ മരണത്തില് ആരോപണ വിധേയനായ ഡോ. ഇ.എ. റുവൈസിനെ പ്രതിചേര്ത്ത് പോലീസ് കേസെടുത്തു. ആത്മഹത്യാ പ്രേരണാക്കുറ്റവും സ്ത്രീധന നിരോധന നിയമവും ചുമത്തിയാണ് റുവൈസിനെതിരേ മെഡിക്കല് കോളജ് പോലീസ് കേസെടുത്തത്.
ഷഹാനയും റുവൈസുമായുള്ള വിവാഹം നേരത്തെ തീരുമാനിച്ചിരുന്നു. എന്നാല്, യുവാവിന്റെ വീട്ടുകാര് ഉയര്ന്ന സ്ത്രീധനമാണ് വിവാഹത്തിനായി ആവശ്യപ്പെട്ടത്. 150 പവനും 15 ഏക്കര് ഭൂമിയും ഒരു ബിഎംഡബ്ല്യൂ കാറുമാണ് സ്ത്രീധനമായി യുവാവിന്റെ വീട്ടുകാര് ആവശ്യപ്പെട്ടതെന്നാണ് ഷഹാനയുടെ ബന്ധുക്കള് ആരോപിക്കുന്നത്.
യുവാവിന്റെ വീട്ടുകാര് ആവശ്യപ്പെട്ട അത്രയും സ്ത്രീധനം നല്കാന് ഷഹ്നയുടെ വീട്ടുകാര്ക്കായില്ല. ഇതോടെ യുവാവ് വിവാഹത്തില്നിന്ന് പിന്മാറിയെന്നും ഇതിന്റെ മാനസികപ്രയാസം ഷഹാനയെ അലട്ടിയിരുന്നതായും ബന്ധുക്കള് പറയുന്നു. ഇക്കാര്യം സൂചിപ്പിക്കുന്നതാണ് ഷഹാനയുടെ മുറിയില്നിന്ന് കണ്ടെടുത്ത ആത്മഹത്യാക്കുറിപ്പും.