ട്രക്കിംഗിനിടെ വിദ്യാർഥികൾ കാട്ടിൽ കുടുങ്ങിയ സംഭവം: കേസെടുത്ത് വനംവകുപ്പ്
Wednesday, December 6, 2023 6:28 PM IST
കൊല്ലം: ട്രക്കിംഗിനിടെ വിദ്യാർഥികൾ കാട്ടിൽ കുടുങ്ങിയ സംഭവത്തിൽ വനംവകുപ്പ് കേസെടുത്തു. ടീം ലീഡർ രാജേഷിനെതിരെയാണ് കേസ്. ഈ മാസം മൂന്നിനാണ് ക്ലാപ്പന ഷൺമുഖ വിലാസം സ്കൂളിലെ സ്കൗട്ട് ആൻഡ് ഗൈഡ്സ് വിദ്യാർഥികൾ ഉൾക്കാട്ടിൽ കുടുങ്ങിയത്.
കുംഭാവുരൂട്ടി മോഡൽ ഫോറസ്റ്റ് സ്റ്റേഷനിലാണ് രാജേഷിനെതിരെ കേസെടുത്തത്. പ്രകൃതി പഠന ക്യാമ്പിന് നൽകിയ അനുമതിയുടെ മറവിൽ രാജേഷ് സ്കൂൾ അധികൃതരെയും അധ്യാപകരെയും ഇക്കോ ടൂറിസം ഗൈഡുമാരെയും തെറ്റിദ്ധരിപ്പിച്ചാണ് 27 കുട്ടികൾ അടങ്ങുന്ന സംഘവുമായി ഉൾക്കാട്ടിലേക്ക് ട്രക്കിംഗ് നടത്തിയതെന്നും വനംവകുപ്പ് അറിയിച്ചു.
ക്ലാപ്പന ഷൺമുഖ വിലാസം സ്കൂളിലെ 27 വിദ്യാർഥികളും രണ്ട് അധ്യാപകരുമാണ് കനത്ത മഴയിൽ തുവൽമല വനത്തിൽ കുടുങ്ങിയത്. ഇവരെ വനംവകുപ്പും നാട്ടുകാരും ചേർന്നാണ് രക്ഷപ്പെടുത്തിയത്.