സഖ്യം അത്രയില്ല;"ഇന്ത്യ'യുടെ യോഗം മാറ്റി
Tuesday, December 5, 2023 2:25 PM IST
ന്യൂഡല്ഹി: ബുധനാഴ്ച നടക്കാനിരുന്ന പ്രതിപക്ഷ കൂട്ടായ്മയായ "ഇന്ത്യ'യുടെ യോഗം മാറ്റിവച്ചു. കോണ്ഗ്രസ് മേധാവി മല്ലികാര്ജുന് ഖാര്ഗെ വിളിച്ച യോഗം ഇനി ഈ മാസം മൂന്നാംവാരത്തില് നടക്കുമെന്നാണ് റിപ്പോര്ട്ട്.
നേരത്തെ, യോഗത്തില് നിന്നും ബീഹാര് മുഖ്യമന്ത്രി നിതീഷ് കുമാറും ബംഗാള് മുഖ്യമന്ത്രി മമതാ ബാനര്ജിയും സമാജ്വാദി പാര്ട്ടി നേതാവ് അഖിലേഷ് യാദവും വിട്ടുനില്ക്കുമെന്ന സൂചനകള് ഉണ്ടായിരുന്നു.
പ്രതിനിധികളെ അയയ്ക്കുമെന്നായിരുന്നു നിതീഷ് കുമാറും അഖിലേഷും അറിയിച്ചത്. നിയമസഭ തെരഞ്ഞെടുപ്പുകളില് കോണ്ഗ്രസിനേറ്റ തിരിച്ചടിക്ക് പിന്നാലെ "ഇന്ത്യ' സഖ്യത്തിലെ ഭിന്നിപ്പ് രൂക്ഷമാകുകയാണ്.
സഖ്യകക്ഷികളുമായി സീറ്റ് പങ്കിടാന് സമ്മതിച്ചിരുന്നെങ്കില് പാര്ട്ടിയുടെ തോല്വിയുടെ മാര്ജിന് ചെറുതാകുകയോ ഒഴിവാക്കുകയോ ചെയ്യാമായിരുന്നുവെന്ന് അഖിലേഷ് യാദവും മമതാ ബാനര്ജിയും ചൂണ്ടിക്കാട്ടി.
സഖ്യത്തിന്റെ നേതൃസ്ഥാനം മമതക്ക് നല്കണമെന്ന് തൃണമൂല് നേതാക്കള് സൂചിപ്പിച്ചു. കൈയിലുണ്ടായിരുന്ന രണ്ട് സംസ്ഥാനങ്ങളില് കൂടി അധികാരം നഷ്ടമായ കോണ്ഗ്രസ് സഖ്യത്തിന്റെ നേതൃസ്ഥാനംവഹിക്കുന്നതിനെ അവര് വിമര്ശിക്കുന്നു.
എന്നാല് നിയമസഭാ തെരഞ്ഞെടുപ്പില് പ്രതിപക്ഷത്തിന് വോട്ട് ചെയ്യണമെന്ന് പോലും ആവശ്യപ്പെടാത്ത നേതാവാണ് മമതയെന്ന് അധിര് രഞ്ജന് ചൗധരി കുറ്റപ്പെടുത്തി.
അതേ സമയം, നിയമസഭാ തെരഞ്ഞെടുപ്പ് ഫലങ്ങള്ക്ക്പിന്നാലെ ഉത്തരേന്ത്യയിലെ ഏറ്റവും വലിയ പാര്ട്ടി തങ്ങളാണെന്ന പ്രതികരണവുമായി ആംആദ്മി പാര്ട്ടിയും രംഗത്തെത്തി.