മാര്ക്ക് വിതരണം: പൊതുവിദ്യാഭ്യാസ ഡയറക്ടർ പറഞ്ഞത് സർക്കാർ നയമല്ലെന്ന് വിദ്യാഭ്യാസമന്ത്രി
Tuesday, December 5, 2023 1:01 PM IST
തിരുവനന്തപുരം: വാരിക്കോരിയുള്ള മാര്ക്ക് വിതരണത്തെ വിമര്ശിച്ച പൊതുവിദ്യാഭ്യാസ ഡയറക്ടര് എസ്.ഷാനവാസിനെ തള്ളി വിദ്യാഭ്യാസമന്ത്രി വി.ശിവന്കുട്ടി. പൊതുവിദ്യാഭ്യാസ ഡയറക്ടര് ആഭ്യന്തര യോഗത്തില് പറഞ്ഞത് സര്ക്കാര് നയമല്ലെന്ന് മന്ത്രി പറഞ്ഞു.
പരീക്ഷയില് കുട്ടികളെ തോല്പ്പിച്ച് വിദ്യാഭ്യാസത്തിന്റെ ഗുണമേന്മ വര്ധിപ്പിക്കുന്നത് ലക്ഷ്യമല്ല. എല്ലാവരെയും ഉള്ക്കൊള്ളിച്ച് ഗുണമേന്മ വര്ധിപ്പിക്കുകയാണ് സർക്കാരിന്റെ ലക്ഷ്യം. അതില് മാറ്റം വരുത്തില്ലെന്നും മന്ത്രി പ്രതികരിച്ചു.
എസ്എസ്എല്സി ചോദ്യപേപ്പര് തയാറാക്കുന്നതിനായി കഴിഞ്ഞ നവംബറില് ചേര്ന്ന അധ്യാപകരുടെ ശില്പശാലയില്വച്ചായിരുന്നു വാരിക്കോരിയുള്ള മാര്ക്ക് വിതരണത്തിനെതിരേ പൊതുവിദ്യാഭ്യാസ ഡയറക്ടർ വിമർശനം ഉന്നയിച്ചത്. ഇതിന്റെ ശബ്ദരേഖ അടക്കം പുറത്തുവന്നിരുന്നു.
കേരളത്തില് നിലവില് 69,000ല് അധികം വിദ്യാര്ഥികള് എ പ്ലസ് നേടുമ്പോള് ഭൂരിഭാഗം വിദ്യാര്ഥികള്ക്കും സ്വന്തം പേരും രജിസ്റ്റര് നമ്പറും കൂട്ടിവായിക്കാന് അറിയില്ലെന്നായിരുന്നു വിമർശനം.
പരീക്ഷകള് പരീക്ഷകളാവുക തന്നെ വേണം. കുട്ടികള് ജയിച്ചുകൊളളട്ടെ വിരോധമില്ല. പക്ഷേ അമ്പത് ശതമാനത്തില് കൂടുതല് മാര്ക്ക് വെറുതെ നല്കരുതെന്ന് അദ്ദേഹം അധ്യാപകരോട് പറയുന്നതായി ശബ്ദരേഖയിൽ വ്യക്തമാണ്.
എ പ്ലസും, എ ഗ്രേഡും നിസാരമല്ല. ഇത് കുട്ടികളോടുള്ള ചതിയാണ്. സ്വന്തം പേര് എഴുതാനറിയാത്തവര്ക്ക് പോലും എ പ്ലസ് നല്കുകയാണെന്നും അദ്ദേഹം വിമര്ശിച്ചിരുന്നു.