നവകേരള സദസ്: കോട്ടയത്തെ വേദിയിൽ അവ്യക്തത
Friday, December 1, 2023 3:21 PM IST
കോട്ടയം: നവകേരള സദസിന്റെ കോട്ടയം നഗരത്തിൽ വേദിയെക്കുറിച്ച് അവ്യക്തത തുടരുന്നു. തിരുനക്കരയിലോ, നാഗന്പടത്തോ പരിപാടി നടത്തേണ്ടത് എന്ന വിഷയത്തിലാണ് ആശയക്കുഴപ്പം തുടരുന്നത്.
തിരുനക്കര ബസ് സ്റ്റാൻഡ് പൊളിച്ചതിനുശേഷം അവിടെ നടത്താമെന്നാണ് ഇതുവരെയുള്ള തീരുമാനം. എന്നാൽ പൊളിക്കൽ അനന്തമായി നീണ്ടതോടെ തിരുനക്കരയിൽ സദസിന് വേദിയൊരുക്കാനാകുമോയെന്ന് സംശയമേറിയിരിക്കുകയാണ്.
ഇതോടെയാണ് വേദിക്ക് നെഹ്റു സ്റ്റേഡിയത്തിനെയും പരിഗണിക്കാൻ തീരുമാനിച്ചത്. കാടുപിടിച്ചുകിടന്ന നെഹ്റു സ്റ്റേഡിയത്തിൽ വ്യാഴാഴ്ച തൊഴിലാളികളെ ഇറക്കി ശുചീകരണം തുടങ്ങിയിരുന്നു. സ്റ്റേഡിയത്തിലെ മരശിഖിരങ്ങളും മുറിച്ചുനീക്കി.
ജില്ലാ കളക്ടർ ഉൾപ്പടെയുള്ള ഉദ്യോഗസ്ഥർ സ്ഥലം സന്ദർശിച്ച് ഒരുക്കങ്ങൾ വിലയിരുത്തിയിരുന്നു. അതേസമയം പോലീസ് പരേഡ് ഗ്രൗണ്ടും സദസ് നടത്തുന്നതിന് ജില്ലാ ഭരണകൂടത്തിന്റെ പരിഗണനയിലുണ്ട്.
കാഞ്ഞിരപ്പള്ളി മണ്ഡലത്തിലെ നവകേരള സദസിനായി പൊൻകുന്നം വൊക്കേഷണൽ ഹയർ സെക്കൻഡറി സ്കൂളിന്റെ പഴയ കെട്ടിടം ഇടിച്ചുപൊളിച്ചത് വാർത്തയായിരുന്നു. കാലപ്പഴക്കം ചെന്ന കെട്ടിടം പൊളിച്ചുനീക്കിയെന്നാണ് അധികൃതരുടെ വിശദീകരണം. സ്ഥലത്ത് ദ്രുതഗതിയിലാണ് ജോലികൾ നടക്കുന്നത്. സ്കൂൾ ഇടിച്ചുനിരത്തിയതിനെതിരേ യൂത്ത് കോൺഗ്രസിന്റെ നേതൃത്വത്തിൽ സ്ഥലത്ത് പ്രതിഷേധം സംഘടിപ്പിച്ചിരുന്നു.
ഡിസംബർ 12ന് രാവിലെ പീരുമോട്ടിൽ മന്ത്രിസഭായോഗത്തിനും നവകേരളസദസിനും ശേഷം മുണ്ടക്കയത്തുവച്ചാണ് യാത്ര കോട്ടയം ജില്ലയില് പ്രവേശിക്കുന്നത്.