കണ്ണൂർ വിസി കേസിലെ വിധി തിരിച്ചടിയല്ല; ഗവർണറുടേത് വിചിത്ര നിലപാട്: മുഖ്യമന്ത്രി
Friday, December 1, 2023 12:24 PM IST
പാലക്കാട്: കണ്ണൂര് സര്വകലാശാല വൈസ് ചാന്സലര് ഡോ. ഗോപിനാഥ് രവീന്ദ്രന്റെ പുനര്നിയമനം റദ്ദാക്കിയ സുപ്രീംകോടതി വിധി സര്ക്കാരിന് തിരിച്ചടിയല്ലെന്ന് മുഖ്യമന്ത്രി പിണറായി വിജയന്.
വൈസ് ചാന്സലറുടെ പുനര് നിയമനത്തെ സംബന്ധിച്ച് മൂന്ന് നിയമപ്രശ്നങ്ങളാണ് സുപ്രീം കോടതി പരിഗണിച്ചത്. ഒന്ന് വൈസ് ചാന്സലര് തസ്തിക നിശ്ചിത കാലാവധിയുള്ള തസ്തികയാണ്. അതിലേക്ക് പുനര്നിയമനമാകാമോ ഇതാണ് ഒരു ചോദ്യം. പുനര്നിയമനമാകാമെന്നാണ് സുപ്രീം കോടതി പറഞ്ഞതെന്നും മുഖ്യമന്ത്രി കൂട്ടിച്ചേർത്തു.
ഗോപിനാഥിന് വിസി ആയി പുനർനിയമനം നൽകാൻ പ്രായപരിധി ബാധകമല്ലെന്ന് കോടതി നിരീക്ഷിച്ചു. പുനർനിയമനത്തിലും സെർച്ച് പാനൽ പ്രകാരം നടപടി വേണോയെന്ന നിയമപ്രശ്നത്തിലും ഈ പ്രക്രിയ ആവശ്യമില്ലെന്ന് കോടതി വ്യക്തമാക്കി.
ആദ്യനിയമനത്തിലെന്ന പോലെ പുനര് നിയമനത്തിലും സെലക്ഷന് സെര്ച്ച് പാനല് രൂപീകരിച്ച് അതിന് പ്രകാരം നടപടി ആരംഭിക്കേണ്ടതുണ്ടോ എന്ന ചോദ്യത്തിന് പുനര്നിയമനത്തിന് ഈ പ്രക്രിയ ആവശ്യമില്ലെന്നാണ് കോടതി പറഞ്ഞത്. ഈ മൂന്ന് വാദങ്ങളാണ് പുനര്നിയമനവുമായി ഉയര്ന്നുവന്നത്. ഇത് സര്ക്കാര് നിലപാട് ശരിവയ്ക്കുകയാണ് സുപ്രീം കോടതി ചെയ്തതെന്നും മുഖ്യമന്ത്രി പറഞ്ഞു.
വിധിക്കു ശേഷമുള്ള ഗവർണറുടെ പ്രസ്താവന മറ്റേതെങ്കിലും സ്വാധീനത്തിന് വഴങ്ങിയാണോയെന്ന് സംശയമുണ്ട്. പ്രോ- ചാൻസിലർ, ചാൻസിലർക്കയച്ച കത്താണ് ബാഹ്യസമ്മർദ്ദമായി പറയുന്നത്. അതെങ്ങനെ ബാഹ്യസമ്മർദ്ദമാകുമെന്ന് മുഖ്യമന്ത്രി ചോദിച്ചു.
പുനര് നിയമനത്തില് യുജിസിയുടെ ഒരു ചട്ടവും ലംഘിച്ചിട്ടില്ലെന്നാണ് വിധിന്യായത്തില് സുപ്രീം കോടതി പറഞ്ഞത്. ഗവര്ണറുടെ ഈ വാദം സുപ്രീം കോടതി തിരുത്തിയിട്ടും അദ്ദേഹം അത് ആവര്ത്തിക്കുന്നത് വിചിത്രനിലപാടാണെന്നും മുഖ്യമന്ത്രി വാര്ത്താസമ്മേളനത്തില് പറഞ്ഞു.