തട്ടിക്കൊണ്ടുപോയ കുട്ടിയെ സ്ത്രീ ആശ്രാമം മൈതാനത്തെത്തിച്ചത് ഒക്കത്തിരുത്തി; ദൃശ്യങ്ങള് പുറത്ത്
Thursday, November 30, 2023 3:14 PM IST
കൊല്ലം: ഓയൂരില് ആറ് വയസുകാരിയെ തട്ടിക്കൊണ്ടുപോയ സംഭവത്തില് കൂടുതല് സിസിടിവി ദൃശ്യങ്ങള് പുറത്ത്. തട്ടിക്കൊണ്ടുപോയ സംഘത്തിലെ സ്ത്രീ ഓട്ടോയില്നിന്ന് ഇറങ്ങിയ ശേഷം കുട്ടിയെ ഒക്കത്തിരുത്തി കൊല്ലം ആശ്രാമം മൈതാനത്തെത്തിക്കുന്ന ദൃശ്യങ്ങളാണ് പുറത്തുവന്നത്.
ചൊവ്വാഴ്ച ഉച്ചയ്ക്ക് 1:14നാണ് ഇവര് ഓട്ടോയില് ഇവിടെ എത്തിയത്. മൈതാനത്തിന് സമീപമുള്ള ബാറിന്റെ തൊട്ടുമുമ്പിലായാണ് ആദ്യം ഓട്ടോറിക്ഷ നിര്ത്തിയത്. എന്നാല് ഇവിടെ സിസിടിവി ഉണ്ടെന്ന് ബോധ്യമുണ്ടായിരുന്ന സ്ത്രീ വാഹനം കുറച്ചുകൂടി മുമ്പോട്ട് കയറ്റി നിര്ത്താന് ആവശ്യപ്പെടുകയായിരുന്നു. ഇതുകൊണ്ട് അകലെ നിന്നുള്ള ദൃശ്യങ്ങള് മാത്രമാണ് സിസിടിവിയില് പതിഞ്ഞിട്ടുള്ളത്.
പിന്നീട് കുട്ടിയെ ഒക്കത്തിരുത്തി കുഞ്ഞുമായി മൈതാനത്തിന് സമീപത്തേയ്ക്ക് നീങ്ങി. 15 മിനിറ്റോളം കുഞ്ഞിനൊപ്പം ഇരുന്നശേഷമാണ് ഇവര് മടങ്ങിയത്. ഇതിന് പിന്നാലെയാണ് കോളജ് വിദ്യാര്ഥികള് കുഞ്ഞിനെ തിരിച്ചറിഞ്ഞത്. എന്നാല് ഇവിടെനിന്ന് സ്ത്രീ മടങ്ങിയതെങ്ങനെയാണെന്ന കാര്യം ഇപ്പോഴും വ്യക്തമായിട്ടില്ല.
കഴിഞ്ഞ തിങ്കളാഴ്ച വൈകുന്നേരം നാലരയ്ക്ക് ട്യൂഷൻ കഴിഞ്ഞ് മടങ്ങുന്നതിനിടെയാണ് ഓയൂരില്നിന്ന് ആറ് വയസുകാരിയെ നാലംഗ സംഘം തട്ടിക്കൊണ്ട് പോയത്. 21 മണിക്കൂറിന് ശേഷം ആശ്രാമം മൈതാനത്തുനിന്നാണ് കുട്ടിയെ കണ്ടെത്തിയത്. സംഭവത്തിൽ ഇതുവരെ പ്രതികളെക്കുറിച്ച് വ്യക്തമായ സൂചന ലഭിച്ചിട്ടില്ല.