അഞ്ച് കോളനികളിലെ വീടുകള് അപകടാവസ്ഥയില്; നിലമ്പൂരിലെ ആദിവാസി ദുരിതം സംബന്ധിച്ച റിപ്പോർട്ട് ഹൈക്കോടതിയില്
Thursday, November 30, 2023 10:16 AM IST
മലപ്പുറം: നിലമ്പൂരിലെ ആദിവാസി ദുരിതം സംബന്ധിച്ച് ലീഗല് സര്വീസ് അതോറിറ്റി ഹൈക്കോടതിയില് റിപ്പോര്ട്ട് സമര്പ്പിച്ചു. അഞ്ച് കോളനികളിലെ വീടുകള് അപകടാവസ്ഥയിലാണെന്ന് റിപ്പോര്ട്ടില് പറയുന്നു. റിപ്പോര്ട്ട് ചീഫ് ജസ്റ്റീസ് അധ്യക്ഷനായ ഡിവിഷന് ബെഞ്ച് ഇന്ന് പരിഗണിക്കും.
2019ലെ പ്രളയത്തിന് ശേഷം പ്രദേശത്തെ മിക്ക വീടുകളും വാസയോഗ്യമല്ലാതായെന്ന് റിപ്പോര്ട്ടില് പറയുന്നു. കോളനിയിലെ ഭൂരിപക്ഷം പേരും വനത്തിനുള്ളില് പ്ലാസ്റ്റിക് ഷീറ്റ് വലിച്ചുകെട്ടി ഉണ്ടാക്കിയ കുടിലുകളിലാണ് താമസിക്കുന്നത്. ഹൈക്കോടതി ഇടപെടലുകൊണ്ട് മൂന്ന് ബയോ ടോയ്ലെറ്റുകള് മാത്രമാണ് സ്ഥാപിച്ചിട്ടുള്ളത്.
ചില കോളനികളില് ലൈഫ് മിഷന് പദ്ധതിപ്രകാരം സ്ഥാപിച്ച വീടുകളില് ശുചിമുറിയുണ്ടെങ്കിലും ഇവിടെ വൈദ്യുതി ഇല്ലെന്നും റിപ്പോര്ട്ടില് പറയുന്നു.
ആദിവാസി കോളനികളുടെ ദുരിതം പരിഹരിക്കാന് നടപടി ആവശ്യപ്പെട്ട് കോണ്ഗ്രസ് നേതാവ് ആര്യാടന് ഷൗക്കത്താണ് ഹൈക്കോടതിയെ സമീപിച്ചത്. ഹര്ജി പരിഗണിച്ച കോടതി ട്രൈബല് ഡെവലപ്പ്മെന്റ് പ്രോഗ്രാം ഓഫീസറോട് റിപ്പോര്ട്ട് സമര്പ്പിക്കാന് ആവശ്യപ്പെട്ടിരുന്നു. എന്നാല് കോളനിയിലെ വീടുകള് വാസയോഗ്യമാണെന്ന റിപ്പോര്ട്ടാണ് ഓഫീസര് സമര്പ്പിച്ചത്.
ഹര്ജിക്കാരന് ഇതിനെ എതിര്ത്ത് രംഗത്തുവന്നതോടെ ലീഗല് സര്വീസ് അതോറിറ്റിയോട് റിപ്പോര്ട്ട് സമര്പ്പിക്കാന് കോടതി നിര്ദേശം നല്കുകയായിരുന്നു. ഇതിന്റെ അടിസ്ഥാനത്തില് ലീഗല് സര്വീസ് അതോറിറ്റി ജഡ്ജി നിലമ്പൂരിലെ ആദിവാസി കോളനികള് നേരിട്ട് സന്ദര്ശിച്ച് ഇവരുടെ മൊഴികള് അടക്കം രേഖപ്പെടുത്തിയാണ് റിപ്പോര്ട്ട് തയാറാക്കിയത്.