പുലി ചത്ത സംഭവം; വനംവകുപ്പിന് വീഴ്ചയുണ്ടായിട്ടില്ലെന്ന് മന്ത്രി ശശീന്ദ്രന്
Thursday, November 30, 2023 9:41 AM IST
തിരുവനന്തപുരം: കണ്ണൂരില് കിണറ്റില് നിന്ന് പിടികൂടിയ പുലി ചത്ത സംഭവത്തില് വനംവകുപ്പ് ഉദ്യോഗസ്ഥര്ക്ക് വീഴ്ചയുണ്ടായിട്ടില്ലെന്ന് വനംമന്ത്രി എ.കെ.ശശീന്ദ്രന്.
പുലിയെ മയക്കുവെടി വയ്ക്കാതെ പിടികൂടാന് കഴിയില്ല. മയക്കുവെടി വയ്ക്കാതെ അപകടകാരികളായ മൃഗങ്ങളെ പിടിക്കാനുള്ള മറ്റ് ശാസ്ത്രീയ മാര്ഗങ്ങളൊന്നും ഉദ്യോഗസ്ഥര്ക്ക് മുന്നില് ഇപ്പോഴില്ല. ജനങ്ങളുടെ ജീവനാണ് പ്രധാനമെന്നും മന്ത്രി പ്രതികരിച്ചു.
ഇത്തരം കാര്യങ്ങളില് വിമര്ശനം ഉന്നയിക്കുന്നത് ഉദ്യോഗസ്ഥരുടെ മനോവീര്യത്തെ തകര്ക്കുമെന്നും മന്ത്രി കൂട്ടിച്ചേർത്തു. പാനൂര് പെരിങ്ങത്തൂരില് കിണറ്റില്നിന്നും പിടികൂടിയ പുലിയാണ് ബുധനാഴ്ച വൈകിട്ടോടെ ചത്തത്.
പുലിയെ മയക്കുവെടിവച്ചാണ് കിണറ്റില്നിന്നും പിടികൂടി കൂട്ടിലേക്ക് മാറ്റിയത്. ഇതിനു പിന്നാലെയാണ് പുലി ചത്തത്.