മാക്സ്വെല്ലിനു സെഞ്ചുറി, ഓസീസിന് അഞ്ച് വിക്കറ്റ് ജയം
Tuesday, November 28, 2023 11:26 PM IST
ഗോഹട്ടി: ഇന്ത്യയ്ക്കെതിരായ മൂന്നാം ട്വന്റി-20യിൽ ഓസ്ട്രേലിയയ്ക്ക് ജയം. അഞ്ച് വിക്കറ്റിനായിരുന്നു ഓസീസിന്റെ ജയം. സ്കോർ: ഇന്ത്യ 222-3 (20), ഓസ്ട്രേലിയ 225-5 (20).
ഇന്ത്യ ഉയർത്തിയ 223 റണ്സ് വിജയലക്ഷ്യം മാക്സ്വെല്ലിന്റെ സെഞ്ചുറി കരുത്തിലാണ് ഓസ്ട്രേലിയ മറികടന്നത്. 48 പന്തിൽ 104 റണ്സെടുത്ത മാക്സ്വെൽ പുറത്താകാതെ ഓസീസിനെ വിജയതേരിലേറ്റുകയായിരുന്നു. എട്ട് വീതം സിക്സും ഫോറും ഉൾപ്പെടുന്നതായിരുന്നു മാക്സ്വെല്ലിന്റെ ഇന്നിംഗ്സ്.
ട്രാവിസ് ഹെഡ് 35 റണ്സും നേടി. മാത്യു വെഡ് പുറത്താകാതെ 28 റണ്സും നേടി. ഇന്ത്യയ്ക്കായി രവി ബിഷ്ണോയി രണ്ട് വിക്കറ്റ് വീഴ്ത്തി.
ടോസ് നഷ്ടപ്പെട്ട് ആദ്യം ബാറ്റ് ചെയ്ത ഇന്ത്യ ഋതുരാജ് ഗെയ്ക്വാദിന്റെ സെഞ്ചുറി കരുത്തിലാണ് മികച്ച നിലയിലെത്തിയത്. 57 പന്തിൽ 123 റണ്സുമായി ഗെയ്ക്വാദ് പുറത്താകാതെ നിന്നു. 13 ഫോറും ഏഴ് സിക്സും ഉൾപ്പെടുന്നതായിരുന്നു ഗെയ്ക്വാദിന്റെ ഇന്നിംഗ്സ്.
സൂര്യകുമാർ യാദവ് 29 പന്തിൽ 39 റണ്സെടുത്തു. തിലക് വർമ പുറത്താകാതെ 31 റണ്സും നേടി. യശ്വസി ജയ്സ്വാളും (6), ഇഷാൻ കിഷനും (0) നിരാശപ്പെടുത്തി.