കെഎസ്യു പ്രവര്ത്തകന്റെ കഴുത്തു ഞെരിച്ച സംഭവം; ഡിസിപിക്കെതിരെ കേസെടുത്ത് മനുഷ്യാവകാശ കമ്മീഷൻ
Tuesday, November 28, 2023 10:51 PM IST
കോഴിക്കോട്: കെഎസ്യു പ്രവര്ത്തകന്റെ കഴുത്തു ഞെരിച്ച സംഭവത്തില് കോഴിക്കോട് ഡിസിപി കെ.ഇ. ബൈജുവിനെതിരെ മനുഷ്യാവകാശ കമ്മീഷന് കേസെടുത്തു. ഡിസിപിക്ക് അടുത്ത സിറ്റിംഗില് നേരിട്ട് ഹാജരാകാന് മനുഷ്യാവകാശ കമ്മീഷന് സമന്സ് അയച്ചു.
സിറ്റി പോലീസ് കമ്മീഷണർ സംഭവം അന്വേഷിച്ച് 14 ദിവസത്തിനകം റിപ്പോർട്ട് നൽകണമെന്നും മനുഷ്യാവകാശ കമ്മീഷന് ഉത്തരവിട്ടു. മനുഷ്യാവകാശ കമ്മീഷന് ആക്റ്റിംഗ് ചെയർപേഴ്സൻ കെ. ബൈജു നാഥാണ് കേസ് പരിഗണിച്ചത്.
കഴിഞ്ഞ ദിവസം കോഴിക്കോട് എരഞ്ഞിപ്പാലത്ത് നവകേരള സദസിനെത്തിയ മുഖ്യമന്ത്രിക്കെതിരെ കരിങ്കൊടി പ്രതിഷേധത്തിനെത്തിയപ്പോഴാണ് കെഎസ്യു പ്രവര്ത്തകന് ജോയല് ആന്റണിയുടെ കഴുത്തു പിടിച്ച് ഡിസിപി ബൈജു ഞെരിച്ചത്. സംഭവത്തില് ജോയല് പരാതിയും നല്കിയിരുന്നു.