നാണംകെട്ടത്, എന്നാലും അദ്ഭുതമില്ല; ബിജെപി നേതാവിന്‍റെ പരാമർശത്തിനെതിരേ ഒവൈസി |

Click here for detailed news of all items

നാണംകെട്ടത്, എന്നാലും അദ്ഭുതമില്ല; ബിജെപി നേതാവിന്‍റെ പരാമർശത്തിനെതിരേ ഒവൈസി

Tuesday, December 1, 2020 12:04 PM IST

ഹൈദരാബാദ്: മുസ്ലിം വിഭാഗത്തിൽ നിന്നുള്ളവർക്കു തെരഞ്ഞെടുപ്പിൽ മത്സരിക്കാൻ ടിക്കറ്റ് നൽകില്ലെന്ന ബിജെപി നേതാവിന്‍റെ പരാമർശത്തിനെതിരേ വിമർശനവുമായി എഐഎംഐഎം മേധാവി അസദുദ്ദീൻ ഒവൈസി.

ബിജെപി നേതാവിന്‍റെ പരാമർശം വെറുപ്പുളവാക്കുന്നതാണ്, നാണംകെട്ടതാണ്. എന്നാൽ ഈ പരാമർശത്തിൽ അദ്ഭുതമില്ല. ഒരു വിഭാഗത്തിനു മാത്രമേ രാഷ്ട്രീയാധികാരം നേടാനുള്ള അവകാശമുള്ളെന്നും മറ്റുള്ളവർ പാദസേവ ചെയ്യുന്നവരാണെന്നുമാണ് അവർ വിശ്വസിക്കുന്നത്. ഇത്തരം ഒരു ചിന്താഗതി ഭരണഘടനയുമായി ചേർന്നുപോകുന്നതല്ലെന്നും ഒവൈസി പറഞ്ഞു.

കർണാടകയുടെ മന്ത്രിയായ കെ.എസ്. ഈശ്വരപ്പയാണ് മുസ്ലിംകൾക്ക് ബിജെപി മൽസരിക്കാൻ ടിക്കറ്റ് നൽകില്ലെന്ന വിവാദ പ്രസ്താവന നടത്തിയത്.

ഹൈന്ദവ സമുദായത്തിൽപ്പെട്ട ഏതൊരു വ്യക്തിക്കും പാർട്ടി ടിക്കറ്റിൽ മത്സരിക്കാൻ അവസരം നൽകും. ലിംഗായത്തുകാർ, കുറുബകൾ, വൊക്കലിഗക്കാർ, ബ്രാഹ്മണർ തുടങ്ങി ആർക്കുവേണമെങ്കിലും നൽകും. പക്ഷേ മുസ്ലിംകൾക്കു നൽകില്ലെന്ന് ഉറപ്പാണ്- ഈശ്വരപ്പ പറഞ്ഞു. ബെലഗാവി ഹിന്ദുത്വത്തിന്‍റെ കേന്ദ്രമാണെന്നും ഇവിടെ മുസ്ലിംകൾക്കു സീറ്റ് നൽകുന്നതിനെ കുറിച്ച് ആലോചന പോലുമില്ലെന്നും മന്ത്രി കൂട്ടിച്ചേർത്തു.

ലോക്സഭ ഉപതെരഞ്ഞെടുപ്പ് നടക്കാൻ പോകുന്ന ബെലഗാവി മണ്ഡലത്തിലെ സ്ഥാനാർഥി നിർണയത്തെ കുറിച്ചുള്ള ചോദ്യങ്ങൾക്കായിരുന്നു മന്ത്രിയുടെ വർഗീയ പരാമർശം. കർണാടകയിൽ ഗ്രാമവികസന മന്ത്രിയാണ് ഈശ്വരപ്പ. കേന്ദ്രമന്ത്രിയായിരുന്ന സുരേഷ് അംഗഡി കോവിഡ് ബാധിച്ച് മരിച്ചതിനെ തുടർന്നാണു ബെലഗാവിയിൽ ഉപതെരഞ്ഞെടുപ്പ് നടക്കുന്നത്.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.