ആരും എങ്ങോട്ടും പോകില്ല; എംഎൽഎമാരുടെ രാജി വാർത്ത തള്ളി ദേവഗൗഡ |

ബംഗളൂരു: കർണാടകയിൽ ജെഡിഎസിന്‍റെ 20 എംഎൽഎമാർ രാജിക്ക് തയാറാണെന്ന അയോഗ്യനാക്കപ്പെട്ട പാർട്ടി എംഎൽഎ നാരായണ ഗൗഡയുടെ അവകാശവാദം തള്ളി എച്ച്.ഡി. ദേവഗൗഡ. ആരും എവിടെയും പോകില്ലെന്ന് ജെഡിഎസ് അധ്യക്ഷൻ ദേവഗൗഡ പറഞ്ഞു.

ആരും എങ്ങോട്ടും ഓടിപ്പോവില്ല. അദ്ദേഹം എന്താണ് പറഞ്ഞത്? വളരെ മോശമായാണ് അയാൾ സംസാരിക്കുന്നതെന്നും ദേവഗൗഡ കൂട്ടിച്ചേർത്തു. എംഎൽഎമാരായ ജി.ടി ദേവ ഗൗഡ‍യും എസ്ആർ മഹേഷും തമ്മിൽ അഭിപ്രായവ്യത്യാസം നിലനിൽക്കുന്നുണ്ടെന്ന് സമ്മതിച്ച ദേവഗൗഡ എന്നാൽ അവർ പാർട്ടിവിടുമെന്ന് സൂചിപ്പിച്ചിട്ടില്ലെന്നും പറഞ്ഞു.

ജെഡിഎസിന്‍റെ 20 എംഎൽഎമാർ രാജിക്ക് തയാറാണെന്നായിരുന്നു നാരായണ ഗൗഡയുടെ ആരോപണം. സഖ്യസർക്കാറിന്‍റെ വീഴ്ചയ്ക്ക് കാരണമായ വിമത നീക്കം നടത്തി രാജി നൽകിയ എംഎൽഎമാരിൽ ഒരാളാണ് നാരായണ ഗൗഡ. മുൻ പ്രധാനമന്ത്രി എച്ച്.ഡി. ദേവഗൗഡയുടെ കുടുംബത്തേയും നാരായണ ഗൗഡ വിമർശിച്ചു.

അഞ്ചുവർഷമായി ദേവഗൗഡയും കുടുംബവും മാനസികമായി പീഡിപ്പിക്കുകയാണ്. സ്വന്തം കുടുംബത്തിന്‍റെ ക്ഷേമം മാത്രമാണ് ദേവഗൗഡ നോക്കുന്നത്. ഗൗ ഡയും കുടുംബവും രാജ്യത്തിന് ഒരു സംഭാവനയും നൽകിയിട്ടില്ലെന്നും അദ്ദേഹം പറഞ്ഞു. മക്കളെ നിയന്ത്രിക്കാൻ കഴിയാത്ത ദേവഗൗഡയ്ക്കു അവരുടെ പെരുമാറ്റത്തിൽ ലജ്ജയില്ലേയെന്നും നാരായണ ഗൗഡ ചോദിച്ചു.

കുമാരസ്വാമിയുടെ ഇടപെടലാണ് പാർട്ടിയുടെ നിലവിലെ സ്ഥിതിക്ക് പിന്നിൽ. ഒരു മുഖ്യമന്ത്രിയായിരുന്നപ്പോൾ അദ്ദേഹം തങ്ങളെ ഓഫീസിനുള്ളിൽ പ്രവേശി ക്കാൻ അനുവാദം നൽകിയിരുന്നില്ലെന്നും നാരായണ ഗൗഡ കൂട്ടിച്ചേർത്തു.