തൃപ്പൂണിത്തുറ സ്ഫോടനം; മനുഷ്യാവകാശ കമ്മീഷൻ കേസെടുത്തു
Monday, February 12, 2024 8:21 PM IST
കൊച്ചി: തൃപ്പൂണിത്തുറ പടക്കശാലയിലുണ്ടായ സ്ഫോടനത്തില് മനുഷ്യാവകാശ കമ്മീഷൻ കേസെടുത്തു. സംഭവത്തെക്കുറിച്ച് വിശദമായി അന്വേഷിച്ച് പതിനഞ്ച് ദിവസത്തിനകം റിപ്പോർട്ടു നൽകണമെന്ന് എറണാകുളം ജില്ലാ കളക്ടർക്കും സിറ്റിപോലീസ് കമ്മീഷണർക്കും മനുഷ്യാവകാശ കമ്മീഷൻ നിർദേശം നൽകി.
പുതിയകാവ് ക്ഷേത്രത്തിലെ ഉത്സവത്തോടനുബന്ധിച്ച് പടക്കം സംഭരിച്ചത് യാതൊരു അനുമതിയുമില്ലാതെയാണെന്നും കരിമരുന്ന് ഇറക്കാനുള്ള അപേക്ഷ പോലും നല്കിയിട്ടില്ലെന്നും ക്ഷേത്ര ഭരണസമിതിക്കെതിരെ കേസെടുത്തെന്നും ജില്ലാ കളക്ടര് എന്.എസ്.കെ. ഉമേഷ് പറഞ്ഞു.
തിങ്കളാഴ്ച രാവിലെ പുതിയകാവ് ചൂരക്കാട് ഭാഗത്ത് സ്ഫോടകവസ്തുക്കള് ശേഖരിച്ച് വച്ചിരുന്ന സ്ഥലത്താണ് സ്ഫോടനം ഉണ്ടായത്. സ്ഫോടനത്തില് ഒരാള് മരിക്കുകയും 16 പേരെ ആശുപത്രിയില് പ്രവേശിപ്പിക്കുകയും ചെയ്തു. ഗുരുതരമായി പരിക്കേറ്റ നാലുപേർ മെഡിക്കല് കോളജ് ആശുപത്രിയിൽ ചികിത്സയിലാണ്.
സ്ഫോടനത്തെ തുടർന്ന് സ്ഥലത്തെ ഇരുപതോളം വീടുകള്ക്ക് കേടുപാടുകള് സംഭവിച്ചിരുന്നു. ഇരുനില വീടുകളുടെ കോൺക്രീറ്റും ജനൽപാളികളും അടർന്നുവീണ നിലയിലാണ്.