വിദേശ സര്വകലാശാല: നയം പുനഃപരിശോധിക്കാൻ സിപിഎം
Monday, February 12, 2024 4:59 PM IST
തിരുവനന്തപുരം: ബജറ്റിൽ നിർദേശിച്ച വിദേശ സര്വകലാശാലകളെ സ്വീകരിക്കാനുള്ള തീരുമാനം വിവാദമായതിനെതുടർന്ന് തീരുമാനം പുനപരിശോധിക്കാൻ സിപിഎം. ലോക്സഭാ തെരഞ്ഞെടുപ്പിനുശേഷം വിഷയം പിബി ചര്ച്ച ചെയ്ത ശേഷം മാത്രം തുടര്നടപടി മതിയെന്നാണ് തീരുമാനം.
വിദേശ സർവകലാശാലകളെ സ്വീകരിക്കാനുള്ള തീരുമാനത്തോട് സിപിഐക്ക് കടുത്ത എതിർപ്പാണ്. തീരുമാനം ഇടതുനയത്തിന് വിരുദ്ധമെന്ന നിലപാടിലാണ് സിപിഐ. വിഷയത്തിൽ സിപിഐയുടെ അതൃപ്തി സംസ്ഥാന സെക്രട്ടറി ബിനോയ് വിശ്വം സിപിഎം സംസ്ഥാന സെക്രട്ടറി എം.വി. ഗോവിന്ദനെ അറിയിച്ചിട്ടുണ്ട്.
മുന്നണി ചര്ച്ച ചെയ്യാതെ നിര്ദേശം നടപ്പിലാക്കരുതെന്ന് സിപിഐ ആവശ്യപ്പെടുകയും ചെയ്തിട്ടുണ്ട്. സിപിഐയുടെ വിയോജിപ്പും കൂടി പരിഗണിച്ചാണ് തീരുമാനം.
ജനുവരിയില് പുറത്തിറക്കിയ സിപിഎമ്മിന്റെ പൊളിറ്റ് ബ്യൂറോ നിലപാടില് വിദേശ സര്വകലാശാലയെ എതിര്ക്കുന്ന നിലപാടാണ് സ്വീകരിച്ചിരുന്നത്. ആ നയം മാറാന് സാധ്യതയില്ലെന്നും വിദേശ സര്വകലാശാല വിഷയത്തില് കൂടുതല് തുടര് നടപടിയുണ്ടായേക്കില്ലെന്നുമാണ് വിലയിരുത്തപ്പെടുന്നത്.
സംസ്ഥാന ബജറ്റില് വിദേശ സര്വകലാശാല സംബന്ധിച്ച ധനമന്ത്രിയുടെ പ്രഖ്യാപനം വലിയ രീതിയിലുള്ള വിമര്ശനങ്ങള്ക്ക് വഴിവച്ചിരുന്നു.