മിസ്റ്റർ ഫൈറ്റർ എന്നാണ് ശ്രീശാന്ത് ഗൗതം ഗംഭീറിനെ വിശേഷിപ്പിച്ചത് എന്നതും ശ്രദ്ധേയം. ’ മിസ്റ്റർ ഫൈറ്റർ എപ്പോഴും സഹതാരങ്ങളുമായി പോരടിച്ചുകൊണ്ടിരിക്കും. ഒരു കാരണവുമില്ലെങ്കിലും അങ്ങനെതന്നെയാണ്. വീരു ഭായ് (സേവാഗ്) ഉൾപ്പെടെ തന്റെ സീനിയർ താരങ്ങളെ ബഹുമാനിക്കുക പോലുമില്ല. വിരാട് കോഹ്ലിയെ കുറിച്ച് ലൈവ് പരിപാടിയിൽ ചോദിച്ചതിന് മറ്റെന്തോ ഉത്തരമാണ് ഗംഭീർ നൽകിയത്. അതൊന്നും അംഗീകരിക്കാൻ സാധിക്കില്ല ’- ശ്രീശാന്ത് മത്സരശേഷം രാത്രിയിൽ പങ്കുവച്ച വീഡിയോയിൽ ആരോപിച്ചു.
മത്സരത്തിൽ ക്യാപിറ്റൽസ് 12 റണ്സ് ജയം നേടി. ക്യാപ്റ്റൻ ഗംഭീറിന്റെ (30 പന്തിൽ 51) അർധസെഞ്ചുറി ബലത്തിൽ ഇന്ത്യ ക്യാപിറ്റൽസ് 20 ഓവറിൽ ഏഴ് വിക്കറ്റ് നഷ്ടത്തിൽ 223 റണ്സ് നേടി. ഗുജറാത്ത് ജയ്ന്റ്സിന്റെ മറുപടി 20 ഓവറിൽ ഏഴ് വിക്കറ്റിന് 211ൽ അവസാനിച്ചു. ജയന്റ്സിനായി ക്രിസ് ഗെയ്ൽ (55 പന്തിൽ 84), കെവിൻ ഒബ്രിയാൻ (33 പന്തിൽ 57) എന്നിവർ അർധസെഞ്ചുറി നേടിയിരുന്നു. മത്സരത്തിൽ ശ്രീശാന്ത് മൂന്ന് ഓവറിൽ 35 റണ്സ് വഴങ്ങി ഒരു വിക്കറ്റ് വീഴ്ത്തി.