മുംബൈ: ഓസ്ട്രേലിയൻ പര്യടനത്തിനുള്ള ഇന്ത്യൻ ക്രിക്കറ്റ് ടീമിന്റെ ട്വന്റി-20, ഏകദിന, ടെസ്റ്റ് സംഘത്തെ ബിസിസിസഐ സെലക്ഷൻ കമ്മിറ്റി ഇന്നലെ പ്രഖ്യാപിച്ചു. 49 അംഗ ജംബോ സംഘമാണ് യുഎഇയിൽനിന്ന് ഓസ്ട്രേലിയയിലേക്ക് പുറപ്പെടുക. മലയാളിതാരം സഞ്ജു വി. സാംസണ് ട്വന്റി-20 പരന്പരയ്ക്കുള്ള ഇന്ത്യൻ ടീമിൽ ഉൾപ്പെട്ടു.
സഞ്ജുവിനൊപ്പം കെ.എൽ. രാഹുൽ ആണ് ട്വന്റി-20 സംഘത്തിലെ വിക്കറ്റ് കീപ്പർ സ്ഥാനത്തുള്ളത്. കോൽക്കത്ത നൈറ്റ് റൈഡേഴ്സിന്റെ ലെഗ് സ്പിന്നർ വരുണ് ചക്രവർത്തിയും ട്വന്റി-20 ടീമിൽ ഇടംപിടിച്ചു. മൂന്ന് വീതം ട്വന്റി-20യും എകദിനവും നാല് ടെസ്റ്റുമാണ് പരന്പരയിലുള്ളത്.
ഏകദിന ടീമിൽ കെ.എൽ. രാഹുൽ മാത്രമാണ് വിക്കറ്റ് കീപ്പർ. ഋഷഭ് പന്തിനെ ഉൾപ്പെടുത്തിയില്ല. ടെസ്റ്റിൽ മാത്രമാണ് പന്തിനു സ്ഥാനമുള്ളതെന്നതും ശ്രദ്ധേയം. പേസർ മുഹമ്മദ് സിറാജിനെയും ടെസ്റ്റ് ടീമിൽ ഉൾപ്പെടുത്തി. അഡീഷണൽ ബൗളർമാരായി കമലേഷ് നാഗർകോട്ടി, കാർത്തിക് ത്യാഗി, ഇഷാൻ പൊരുൾ, ടി. നടരാജൻ എന്നിവരും ടീമിലുണ്ട്. പരിക്കേറ്റ രോഹിത് ശർമ, ഇഷാന്ത് ശർമ എന്നിവരെ ഉൾപ്പെടുത്തിയിട്ടില്ല.
ഇന്ത്യൻ മുഖ്യ പരിശീലകൻ രവിശാസ്ത്രിയും സഹപരിശീലകരും ഇന്നലെ യുഎഇയിൽ എത്തി ക്വാറന്റൈനിൽ പ്രവേശിച്ചു. ഇന്ത്യൻ ടീം യുഎഇയിൽനിന്നാണ് ഓസ്ട്രേലിയയിലേക്കു തിരിക്കുക.
ട്വന്റി-20 ടീം: കോഹ്ലി, ധവാൻ, മായങ്ക്, കെ.എൽ. രാഹുൽ, ശ്രേയസ് അയ്യർ, മനീഷ് പാണ്ഡെ, ഹാർദിക്, സഞ്ജു, ജഡേജ, വാഷിംഗ്ടണ് സുന്ദർ, ചാഹൽ, ബുംറ, ഷമി, സൈനി, ദീപക് ചാഹർ, വരുണ് ചക്രവർത്തി.
ഏകദിന ടീം: കോഹ്ലി, ധവാൻ, ശുഭ്മാൻ ഗിൽ, രാഹുൽ, ശ്രേയസ്, മനീഷ്, ഹാർദിക്, മായങ്ക്, ജഡേജ, ചാഹൽ, കുൽദീപ്, ബുംറ, ഷമി, സൈനി, ഷാർദുൾ.
ടെസ്റ്റ് ടീം: കോഹ്ലി, മായങ്ക്, പൃഥി ഷാ, രാഹുൽ, പൂജാര, രഹാനെ, ഹനുമ വിഹാരി, ശുഭ്മാൻ ഗിൽ, സാഹ, ഋഷഭ് പന്ത്, ബുംറ, ഷമി, ഉമേഷ് യാദവ്, സൈനി, കുൽദീപ്, ജഡേജ, ആർ. അശ്വിൻ, മുഹമ്മദ് സിറാജ്.
ആദ്യമത്സരം നവംബർ 27ന് സിഡ്നിയിൽ
പരന്പരയിലെ ആദ്യ മത്സരം നവംബർ 27ന് സിഡ്നിയിൽ നടക്കും. മൂന്ന് മത്സര ഏകദിന പരന്പരയിലെ ആദ്യമത്സരമാണ് സിഡ്നിയിൽ അരങ്ങേറുക. 29ന് രണ്ടാം മത്സരവും സിഡ്നിയിൽ നടക്കും. മൂന്നാം ഏകദിനവും (ഡിസംബർ 1) ട്വന്റി-20 പരന്പരയിലെ ആദ്യമത്സരവും (ഡിസംബർ 4) കാൻബറയിലാണ്. മൂന്ന് മത്സര ട്വന്റി-20 പരന്പരയിലെ അവസാന രണ്ട് മത്സരങ്ങൾക്ക് (ഡിസംബർ 6, 8) സിഡ്നി വേദിയാകും.
പിങ്ക് ടെസ്റ്റ് അഡ്ലെയ്ഡിൽ
പിങ്ക് ബോൾ (ഡേ-നൈറ്റ്) ടെസ്റ്റോടെയാണ് ടെസ്റ്റ് പരന്പരയ്ക്ക് തുടക്കമാകുന്നത്. അഡ്ലെയ്ഡിൽ ഡിസംബർ 17-21 തീയതികളിലാണ് പിങ്ക് ബോൾ ടെസ്റ്റ്. ബോക്സിംഗ് ഡേ ടെസ്റ്റ് മെൽബണിലാണ് (ഡിസംബർ 26-30). മൂന്നും നാലും ടെസ്റ്റുകൾ സിഡ്നി (ജനുവരി 7-11), ബ്രിസ്ബെയ്ൻ (ജനുവരി 15-19) എന്നിവിടങ്ങളിലാണ്. ടീമിനൊപ്പം കുടുംബാംഗങ്ങൾ ഉണ്ടാകില്ല. അഡ്ലെയ്ഡ് ടെസ്റ്റിൽ കാണികൾക്ക് പ്രവേശനം നൽകുമെന്ന് സൂചനയുണ്ട്.