സിറ്റി വീണു, ചെന്പട ഒന്നിൽ : Deepika.com Sports News |

Click here for detailed news of all items

സിറ്റി വീണു, ചെന്പട ഒന്നിൽ

Monday, December 10, 2018 12:57 AM IST

ലണ്ടൻ: ഇംഗ്ലീഷ് പ്രീമിയർ ലീഗ് ഫുട്ബോളിൽ പെപ് ഗ്വാർഡിയോളയുടെ മാഞ്ചസ്റ്റർ സിറ്റിയുടെ ജൈത്രയാത്രയ്ക്കു വിരാമം. മൗറീസിയോ സറിയുടെ ചെൽസിയാണ് സ്വന്തം തട്ടകമായ സ്റ്റാംഫോർഡ് ബ്രിഡ്ജിൽ 2-0നു സിറ്റിയെ കീഴടക്കിയത്. അതേസമയം, എവേ പോരാട്ടത്തിൽ ബോണ്‍മത്തിനെ 0-4നു കീഴടക്കിയ ലിവർപൂൾ തങ്ങളുടെ അപരാജിത മുന്നേറ്റം തുടർന്നു. ജയത്തോടെ ലിവർപൂൾ പോയിന്‍റ് പട്ടികയിൽ ഒന്നാം സ്ഥാനത്ത് എത്തി.

എൻഗോളൊ കാന്‍റെ (45-ാം മിനിറ്റ്), ഡേവിഡ് ലൂയിസ് (78-ാം മിനിറ്റ്) എന്നിവരുടെ ഗോളുകളാണ് സിറ്റിയുടെ വിധി നിശ്ചയിച്ചത്. ജയത്തോടെ ചെൽസി 34 പോയിന്‍റുമായി നാലാം സ്ഥാനത്ത് തുടരുന്നു. സ്റ്റാംഫ്രോഡ് ബ്രിഡ്ജിൽതോൽവി അറിയാതെയുള്ള ചെൽസിയുടെ മുന്നേറ്റം 12-ാം ഇപിഎൽ മത്സരത്തിലും തുടർന്നു. 2015 ഓഗസ്റ്റിലാണ് ചെൽസി സ്വന്തം തട്ടകത്തിൽ അവസാനമായി പരാജയം രുചിച്ചത്.

ജയിംസ് മിൽനറിന്‍റെ 500-ാം പ്രീമിയർ ലീഗ് മത്സരത്തിൽ ലിവർപൂൾ ഏകപക്ഷീയമായി ബോണ്‍മത്തിനെ കീഴടക്കി. ഈജിപ്ഷ്യൻ താരം മുഹമ്മദ് സലയുടെ ഹാട്രിക്കാണ് ചെന്പടയ്ക്ക് മിന്നും ജയം സമ്മാനിച്ചത്. 25, 48, 77 മിനിറ്റുകളിലായിരുന്നു സലയുടെ ഹാട്രിക്ക്. സ്റ്റീവ് കുക്കിന്‍റെ (68-ാം മിനിറ്റ്) സെൽഫ് ഗോളും ചേർന്നപ്പോൾ ലിവർപൂളിന്‍റെ ജയം 4-0 ആയി.

ആഴ്സണൽ സ്വന്തം തട്ടകമായ എമിറേറ്റ്സ് സ്റ്റേഡിയത്തിൽ 1-0ന് ഹഡേഴ്സ്ഫീൽഡിനെ കീഴടക്കി. 82-ാം മിനിറ്റിൽ ലൂകാസ് ടൊറെയ്റയുടെ ബൈസിക്കിൾ കിക്ക് ഗോളാണ് ആഴ്സണലിനു ജയം സമ്മാനിച്ചത്. 34 പോയിന്‍റുള്ള ആഴ്സണൽ അഞ്ചാം സ്ഥാനത്ത് തുടരുകയാണ്. ലീഗിൽ മൂന്നാം സ്ഥാനത്തുള്ള ടോട്ടനം എവേപോരാട്ടത്തിൽ ലീസ്റ്റർ സിറ്റിയെ 0-2നു കീഴടക്കി. സണ്‍ ഹ്യൂൻ മിൻ (45+1-ാം മിനിറ്റ്), ഡാലെ അലി (58-ാം മിനിറ്റ്) എന്നിവരാണ് ഹോട്സ്പറിനുവേണ്ടി ഗോൾ സ്വന്തമാക്കിയത്. ഇതോടെ 36 പോയിന്‍റ് ആയി ടോട്ടനത്തിന്.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.