മെല്‍ബണ്‍: ഓസ്‌ട്രേലിയന്‍ ഓപ്പണ്‍ ടെന്നീസില്‍ അട്ടിമറി. അമേരിക്കന്‍ താരങ്ങളായ വീനസ് വില്യംസും യുഎസ് ഓപ്പണ്‍ ചാമ്പ്യന്‍ സ്ലോവന്‍ സ്റ്റീഫന്‍സും ആദ്യ റൗണ്ടില്‍ പുറത്തായി. വീനസിനെ സ്വിറ്റ്‌സര്‍ലന്‍ഡിന്‍റെ ബെലിന്‍ഡ ബെന്‍സിച്ച് നേരിട്ടുള്ള സെറ്റുകള്‍ക്ക് പരാജയപ്പെടുത്തി. 6-3, 7-5നാണ് കിരീടം നേടുമെന്നു പ്രതീക്ഷിച്ച വീനസിനെ ബെന്‍സിച്ച് കീഴടക്കിയത്. സ്റ്റീഫന്‍സിനെ ചൈനയുടെ ഷാംഗ് ഷുയി 2-6, 7-6, 6-2ന് പരാജയപ്പെടുത്തി. കരോളിന്‍ വോസ്‌നിയാക്കി, എലീന സ്വിറ്റോലിന, യെലേന ഓസ്റ്റാപെങ്കോ എന്നിവര്‍ രണ്ടാം റൗണ്ടിലെത്തി.
പുരുഷ സിംഗിള്‍സില്‍ ലോക ഒന്നാം നമ്പര്‍ റാഫേല്‍ നദാല്‍ 6-1, 6-1, 6-1ന് ഡൊമിനിക്കന്‍ റിപ്പബ്ലിക്കിന്‍റെ വിക്ടര്‍ എസ്‌ട്രേല ബുര്‍ഗോസിനെ പരാജയപ്പെടുത്തി. ഗ്രിഗര്‍ ദിമിത്രോവ്, നിക് കിര്‍ഗിയസ്, ജോ വില്‍ഫ്രഡ് സോംഗ എന്നിവരും രണ്ടാം റൗണ്ടിലെത്തി.
ഇന്ത്യയുടെ യൂക്കി ഭാംബ്രിയെ സൈപ്രസിന്‍റെ മാര്‍കോസ് ബാഗ്ദാറ്റിസ്് 7-6, 6-4, 6-3ന് തോല്‍പ്പിച്ചു. ഓസ്‌ട്രേലിയയുടെ മാത്യു എബ്ഡന്‍ 6-4, 3-6, 6-3, 6-3ന് അമേരിക്കയുടെ ജോണ്‍ ഇസ്‌നറെ അട്ടിമറിച്ചു. കെയ്‌ൽഎഡ്മണ്ട് 6-7, 6-3, 3-6, 6-3, 6-4ന് കെവിന്‍ ആന്‍ഡേഴ്‌സണെ കീഴടക്കി.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.