ലുലുവില്‍ തായ് ഫിയസ്റ്റയ്ക്ക് തുടക്കം
Saturday, July 19, 2025 11:55 PM IST
കോട്ടയം: തായ്‌ലന്‍ഡിന്‍റെ ഭക്ഷണവൈവിധ്യങ്ങളുടെ വിപുലമായ ശ്രേണിയൊരുക്കുന്ന ലുലു തായ് ഫിയസ്റ്റയ്ക്ക് തുടക്കമായി. കൊച്ചി, കോട്ടയം മാളുകളിലാണു തായ് ഭക്ഷ്യമേള ആരംഭിച്ചിരിക്കുന്നത്.
കോട്ടയം മുനിസിപ്പല്‍ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ തായ് ഫിയസ്റ്റയുടെ ഉദ്ഘാടനം നിര്‍വഹിച്ചു. തായ്‌ലൻഡ് വാണിജ്യ മന്ത്രാലയത്തിന്‍റെ കീഴിലുള്ള ഇന്‍റര്‍നാഷണല്‍ ട്രേഡ് പ്രമോഷനും റോയല്‍ തായി ഗവണ്‍മെന്‍റ്, മുംബൈ തായ് ട്രേഡ് സെന്‍റര്‍ എന്നിവയുമായി കൈകോര്‍ത്താണ് ലുലു തായ് ഫിയാസ്റ്റ സംഘടിപ്പിക്കുന്നത്.
ഇരുരാജ്യങ്ങളിലെയും ഭക്ഷ്യവൈവിധ്യങ്ങളെ പരിചയപ്പെടുത്താന്‍ ലക്ഷ്യമിട്ടുള്ളതാണു പരിപാടി. തായ് ഭക്ഷണങ്ങളുടെ പവലിയനും ഉത്പന്നങ്ങളുടെ വിപുലമായ ശ്രേണിയുമാണ് ഒരുങ്ങുന്നത്. തായ്‌ലന്‍ഡിന്‍റെ തനത് ഭക്ഷണവിഭവങ്ങള്‍ മേളയിലൊരുങ്ങും. കൂടാതെ, തായ് സ്‌പെഷല്‍ ചിക്കന്‍ കറി അടക്കം വേറിട്ട ഭക്ഷണങ്ങളും ആസ്വദിക്കാം. തായി ഷെഫുമാര്‍ ഒരുക്കുന്ന ലൈവ് പാചകവും അരങ്ങേറും.
ചടങ്ങില്‍ തായി ട്രേഡ് സെന്‍റര്‍ എക്‌സിക്യൂട്ടീവ് ഡയറക്ടര്‍ സണ്‍ചാവീ പട്ടാനച്ചാക്ക്, ലുലു ഗ്രൂപ്പ് ഇന്ത്യ സിഒഒ രജിത് രാധാകൃഷ്ണന്‍, ലുലു ഇന്ത്യ റീട്ടയില്‍ ജനറല്‍ മാനേജര്‍ സുധീഷ് നായര്‍, ലുലു കൊച്ചി റീജണല്‍ ഡയറക്ടര്‍ സാദിഖ് ഖാസിം, കോട്ടയം ലുലുമാള്‍ ജനറല്‍ മാനേജര്‍ നികിന്‍ ജോസഫ്, ഡെപ്യൂട്ടി മാനേജര്‍ ഹരികൃഷ്ണന്‍, അസി.ബയിംഗ് മാനേജര്‍ ഇസ്മയില്‍ അല്‍ ജമീര്‍ തുടങ്ങിയവര്‍ പങ്കെടുത്തു. തായി ഫിയാസ്റ്റ 31ന് സമാപിക്കും.