നാഫെഡിന്റെ ചതി നാഫെഡ് തമിഴ്നാട്ടിൽനിന്നു സംഭരിച്ച കൊപ്രയിൽനിന്ന് 39,000 ടണ് വിറ്റുമാറാനുള്ള തയാറെടുപ്പിലാണ്. കഴിഞ്ഞ സീസണിൽ ക്വിന്റലിന് 10,860 രൂപ നിരക്കിൽ 1493 കോടി രൂപയ്ക്ക് മൊത്തം 1.33 ലക്ഷം ടണ് കൊപ്ര 90,000 കർഷകരിൽനിന്നാണു കേന്ദ്ര ഏജൻസി സംഭരിച്ചത്. ഇതിൽ തമിഴ്നാട്ടിൽനിന്നുള്ള ഒരു പങ്കാണു വിറ്റുമാറുന്നത്. ഇപ്പോഴത്തെ സാഹചര്യത്തിൽ ആ ചരക്കിന് 8700 പോലും ഉറപ്പുവരുത്താനാകില്ലെന്നു വിപണിവൃത്തങ്ങൾ പറയുന്നു. നടപ്പുസീസണിൽ തമിഴ്നാട് മാത്രം ഏകദേശം 90,000 ടണ് കൊപ്ര സംഭരിച്ചിട്ടുണ്ട്. മൊത്തതിൽ കൊപ്രയുടെ വൻ ശേഖരം രാജ്യത്തുള്ളതിനാൽ കൂടിയ വിലയ്ക്കു ലേലം പിടിക്കാൻ വ്യവസായികൾ തയാറാകില്ല.
കരുതൽ ശേഖരത്തിലുള്ള കൊപ്ര റിലീസിംഗ് നടത്താതെ പകരം എണ്ണയാക്കി വിപണിയിലെത്തിച്ചാൽ പച്ചത്തേങ്ങ, കൊപ്ര വിലകളിൽ സംഭവിക്കാനിടയുള്ള തകർച്ചയെ തടയാനാകും. മാത്രമല്ല, ഏറ്റവും ഗുണനിലവാരവും ഉണക്കും കൂടിയ ഇനം കൊപ്രയാണ് സംഭരണ ഏജൻസി ശേഖരിച്ചിട്ടുള്ളത്. ആ കൊപ്രയിൽനിന്നുള്ള എണ്ണയ്ക്ക് ഡിമാൻഡ് ഉയരുകയും ചെയ്യും.
കാങ്കയത്ത് 9200 രൂപയ്ക്കു കൊപ്ര യഥേഷ്ടം ലഭ്യമാണ്, കേരളത്തിൽ വില 10,000 രൂപയാണ്. തമിഴ്നാട്ടിൽ വെളിച്ചെണ്ണ വില 13,500 രൂപയും കൊച്ചിയിൽ 15,400 രൂപയുമാണ്. ലേലത്തിൽ വിലയിടിച്ചു കൊപ്ര കൈമാറിയാൽ വിപണിയുടെ സന്തുലിതാവസ്ഥയ്ക്കു കോട്ടംതട്ടും. ഒരു കോടിയിൽ ഏറെ വരുന്ന ദക്ഷിണേന്ത്യൻ നാളികേര കർഷകകുടുംബങ്ങളെ സാന്പത്തിക ഞെരുക്കത്തിലാക്കുന്നതിലുപരി സ്റ്റോക്കുളള കൊപ്ര വെളിച്ചെണ്ണയാക്കി ബ്രാൻഡ് നാമത്തിൽ ഇറക്കുന്നതാവും അഭികാമ്യം.
ആഭരണവിപണികളിൽ റിക്കാർഡ് പ്രകടനത്തിനു സ്വർണം ശ്രമം നടത്തിയെങ്കിലും വിദേശത്തുനിന്നുള്ള പ്രതികൂലവാർത്തകൾ തിരിച്ചടിയായി. പവന് 54,080 രൂപയിൽനിന്ന് 55,000 വരെ ഉയർന്നഘട്ടത്തിൽ 55,120ലെ റിക്കാർഡ് വിപണി തകർക്കുമെന്നു വ്യാപാരരംഗം വിലയിരുത്തി. എന്നാൽ, ഇതിനിടെ, രാജ്യാന്തരവില ഇടിഞ്ഞതോടെ വാരാന്ത്യം പവൻ 54,240ലേക്ക് താഴ്ന്നു.
സംഭരണം ഉൗർജിതം ഉത്തരേന്ത്യൻ വ്യവസായികൾ കുരുമുളക് സംഭരണം ഉൗർജിതമാക്കി. ചുരുങ്ങിയ ആഴ്ചകളിൽ ഉത്പന്നവില ക്വിന്റലിന് 2000 രൂപയിലധികം ഇടിഞ്ഞത് അവസരമാക്കി അവർ ചരക്കുവാങ്ങൽ ശക്തമാക്കി. ഉത്തരേന്ത്യൻ വ്യവസായികൾ ഹൈറേഞ്ച്, കൂർഗ് കുരുമുളകിൽ താത്പര്യം കാണിച്ചു. ഓഗസ്റ്റിൽ ഉത്തരേന്ത്യയിൽ ഉത്സവസീസണു തുടക്കംകുറിക്കുന്നതോടെ കുരുമുളക് അടക്കമുള്ള സുഗന്ധവ്യഞ്ജനങ്ങൾക്ക് ആഭ്യന്തര ഡിമാൻഡുയരും. കൊച്ചിയിൽ അണ്ഗാർബിൾഡ് കുരുമുളക് വില 65,400 രൂപയിലാണ്.