സെൻസെക്സ് ഒരിക്കൽക്കൂടി റിക്കാർഡ് പുതുക്കി. സൂചിക 76,992ൽനിന്നും വാരാന്ത്യം സർവകാല റിക്കാർഡായ 77,851 വരെ കുതിച്ചശേഷം ക്ലോസിംഗിൽ 77,209 ലാണ്. അനുകൂല വാർത്തകൾ പുറത്തുവന്നാൽ 77,772 ലേക്കും തുടർന്ന് 78,336 ലേക്കും ഈവാരം ഉയരാം. തിരുത്തൽ സംഭവിച്ചാൽ 76,723ലും 76,238ലും താങ്ങുണ്ട്.
മികച്ച പ്രകടനവുമായി ഇൻഡക്സുകൾ നടപ്പുവർഷത്തെ ആദ്യ ആറു മാസങ്ങൾ അവസാനിക്കുമ്പോൾ നമ്മുടെ ഇൻഡെക്സുകൾ മികച്ച പ്രകടനം കാഴ്ചവച്ചു. കേന്ദ്രബജറ്റുമായി ബന്ധപ്പെട്ട് സർക്കാർ നയപ്രഖ്യാപനങ്ങളെയാവും ഇനി ഫണ്ടുകൾ നിരീക്ഷിക്കുക. പുതിയ പ്രഖ്യാപനങ്ങൾ തങ്ങളെ ഏതുവിധം ബാധിക്കുമെന്നാവും അവർ വിലയിരുത്തുക.
വിദേശ ഫണ്ടുകൾ നാലിൽ, മൂന്നു ദിവസവും നിക്ഷേപകരായി, 10,892 കോടി രൂപയുടെ ഓഹരികൾ വാങ്ങി. ഒരു ദിവസം 1790 കോടി രൂപയുടെ വിൽപ്പന നടത്തി. ആഭ്യന്തര ഫണ്ടുകൾ 9901 കോടി രൂപ നിക്ഷേപവും 326 കോടി രൂപയുടെ വിൽപ്പനയ്ക്കും ഉത്സാഹിച്ചു.
ഡോളറിന് മുന്നിൽ രൂപ തകർച്ച നേരിട്ട ശേഷം സ്റ്റെഡി ക്ലോസിംഗ്. 83.56ൽനിന്നും രൂപ 83.76 ലേക്ക് ദുർബലമായെങ്കിലും വാരാന്ത്യം 83.56 ലാണ്. രൂപ പുതിയ ദിശയ്ക്കായി ശ്രമിച്ചതിനിടയിൽ ദുർബലാവസ്ഥയിലേക്കു നീങ്ങി.
സ്വർണത്തിൽ വിൽപ്പന സമ്മർദം സ്വർണത്തിൽ വിൽപ്പന സമ്മർദം. ട്രോയ് ഔൺസിന് 2368 ഡോളറിൽ ഉടലെടുത്ത സമ്മർദത്തിൽ 2321 ഡോളറിലേക്കു താഴ്ന്നു. സാങ്കേതികമായി വീക്ഷിച്ചാൽ താഴ്ന്ന റേഞ്ചിൽ നിന്നും തിരിച്ചുവരവിൽ 2414 ഡോളർ വരെ മുന്നേറാം.
രാജ്യാന്തര ക്രൂഡ് ഓയിലിലെ നിക്ഷപതാത്പര്യവും ഡോളറിലെ ചാഞ്ചാട്ടവും ബാരലിന് 82.65 ഡോളറിൽനിന്നും 85.08 ലേക്ക് ഉയർത്തി. ബുൾ റാലി കണക്കിലെടുത്താൽ എണ്ണ വില 90 ഡോളർ വരെ സഞ്ചരിക്കാം.