ഇസ്രേലി ആക്രമണത്തിൽ ഗാസയിൽ കൊല്ലപ്പെട്ടവരുടെ എണ്ണം 17,177 ആയെന്നാണു കണക്ക്. 46,000 പേർക്കു പരിക്കേറ്റു. വെസ്റ്റ് ബാങ്കിലെ അൽഫറാ അഭയാർഥി ക്യാന്പിൽ ഇസ്രേലി സേന കഴിഞ്ഞദിവസം നടത്തിയ റെയ്ഡിൽ ആറു പലസ്തീനികൾ കൊല്ലപ്പെട്ടു. വെസ്റ്റ്ബാങ്കിൽ കൊല്ലപ്പെട്ടവരുടെ എണ്ണം 266 ആയി.
ബന്ദികളുടെ കൂട്ടത്തിൽപ്പെട്ട ഒരു ഇസ്രേലി ഭടൻ ഇന്നലെ കൊല്ലപ്പെട്ടതായി ഹമാസ് അറിയിച്ചു. ഇദ്ദേഹത്തെ രക്ഷിക്കാൻ ഇസ്രേലി സേന ശ്രമിക്കുന്നതിനിടെ ഉണ്ടായ ഏറ്റുമുട്ടലിലാണു മരണം സംഭവിച്ചതെന്നും പറഞ്ഞു.
ഇറാക്കിലെ യുഎസ് എംബസിക്കു നേർക്ക് മിസൈൽ ആക്രമണം ബാഗ്ദാദ്: ഇറാക്കിന്‍റെ തലസ്ഥാനമായ ബാഗ്ദാദിലെ യുഎസ് എംബസിക്കു നേർക്ക് വെള്ളിയാഴ്ച മിസൈൽ ആക്രമണമുണ്ടായി. ആളപായവും നാശനഷ്ടവും റിപ്പോർട്ട് ചെയ്തിട്ടില്ല. ആക്രമണത്തിന്‍റെ ഉത്തരവാദിത്വം ആരും ഏറ്റെടുത്തിട്ടില്ല.
ഹമാസ്-ഇസ്രയേൽ യുദ്ധം തുടങ്ങിയശേഷം ഇറാക്കിലെയും സിറിയയിലെയും യുഎസ് ആസ്ഥാനങ്ങളെ ലക്ഷ്യമിട്ട് ആക്രമണങ്ങൾ വർധിച്ചിട്ടുണ്ട്. ഇറാന്‍റെ പിന്തുണയുള്ള സായുധ ഗ്രൂപ്പുകളാണ് ഇതിനു പിന്നിലെന്നു പറയുന്നു.