ജറുസലെമിൽ സ്ഫോടനങ്ങൾ; ഒരാൾ കൊല്ലപ്പെട്ടു
Thursday, November 24, 2022 12:52 AM IST
ടെൽ അവീവ്: ജറുസലെമിലെ തിരക്കേറിയ ബസ് സ്റ്റോപ്പുകളിലുണ്ടായ രണ്ടു സ്ഫോടനങ്ങളിൽ ഒരു ഇസ്രേലി കൊല്ലപ്പെടുകയും 15 പേർക്കു പരിക്കേൽക്കുകയും ചെയ്തു.
നഗരകവാടത്തോടു ചേർന്ന ജിവാത്ത് ഷൗൾ, റമോത്ത് ജംഗ്ഷനുകളിൽ ഇന്നലെ രാവിലെ അര മണിക്കൂറിന്റെ വ്യത്യാസത്തിലായിരുന്നു സ്ഫോടനങ്ങൾ .
നേരത്തേ സ്ഥാപിച്ചിരുന്ന സ്ഫോടകവസ്തുക്കൾ റിമോട്ട് ഉപയോഗിച്ച് പ്രവർത്തിപ്പിക്കുകയായിരുന്നുവെന്ന് ഇസ്രേലി പോലീസ് പറഞ്ഞു.
ഈ വർഷം ഇസ്രയേലിലെ പലഭാഗങ്ങളിൽ സ്ഫോടനങ്ങളും കത്തിയാക്രമണങ്ങളും നടന്നിരുന്നു. ഇതുമായി ബന്ധപ്പെട്ട് ഇസ്രേലി പട്ടാളം പലസ്തീൻ പ്രദേശങ്ങളിൽ വ്യാപകമായി നടത്തിയ റെയ്ഡുകളിലും ഒട്ടേറെപ്പേർ കൊല്ലപ്പെടുകയുണ്ടായി.