മഹേഷ് ഖിചി ഡൽഹി മേയർ
Friday, November 15, 2024 2:14 AM IST
ന്യൂഡൽഹി: എഎപിയിലെ മഹേഷ് ഖിചി ഡൽഹി മേയറായി തെരഞ്ഞെടുക്കപ്പെട്ടു. ബിജെപിയിലെ കിഷൻ ലാലിനെ മൂന്നു വോട്ടിന്‍റെ മാത്രം വ്യത്യാസത്തിലാണു ഖിചി പരാജയപ്പെടുത്തിയത്. ഖിചിക്ക് 133 വോട്ടും കിഷൻ ലാലിന് 130 വോട്ടും ലഭിച്ചു.
ഡെപ്യൂട്ടി മേയറായി എഎപിയിലെതന്നെ രവീന്ദർ ഭരദ്വാജ് എതിരില്ലാതെ തെരഞ്ഞെടുക്കപ്പെട്ടു. നിത ബിഷ്തിനെ ഡെപ്യൂട്ടി മേയർസ്ഥാനത്തേക്ക് ബിജെപി നിർദേശിച്ചെങ്കിലും മത്സരിച്ചില്ല. എട്ട് എഎപി കൗൺസിലർമാർ ക്രോസ് വോട്ട് ചെയ്തതാണ് ബിജെപിയുടെ വോട്ട് വിഹിതം ഉയരാൻ കാരണം.
ഓരോ എഎപി, ബിജെപി കൗൺസിലർമാരുടെ വോട്ട് അസാധുവായി. ഏഴു കോൺഗ്രസ് കൗൺസിലർമാർ വോട്ടിംഗിൽ പങ്കെടുത്തില്ല. ഒരു കൗൺസിലർ അവസാനനിമിഷം പാർട്ടിയിൽനിന്നു രാജിവച്ചു. സബില ബീഗമാണു കോൺഗ്രസ് വിട്ടത്. ഇവർ എഎപിയെ പിന്തുണച്ചു.