എൽപിജി മസ്റ്ററിംഗ്: "സമയപരിധി നിശ്ചയിച്ചിട്ടില്ല'
Wednesday, July 10, 2024 1:52 AM IST
ന്യൂഡല്‍ഹി: ഗാര്‍ഹിക എല്‍പിജി ഉപഭോക്താക്കള്‍ക്കുള്ള ബയോമെട്രിക് ആധാര്‍ പ്രാമാണീകരണത്തിന് (മസ്റ്ററിംഗ്) സമയപരിധി നിശ്ചയിച്ചിട്ടി‌ല്ലെന്ന് കേന്ദ്ര പെട്രോളിയം-പ്രകൃതിവാതക മന്ത്രി ഹർദിപ് സിംഗ് പുരി അറിയിച്ചു. കേരള പ്രതിപക്ഷ നേതാവ് വി.ഡി. സതീശൻ നൽകിയ കത്തിന് മറുപടിയായാണ് മന്ത്രി ഇക്കാര്യം സമൂഹമാധ്യമത്തിലൂടെ വ്യക്തമാക്കിയത്.
സിലിണ്ടർ വിതരണത്തിന് എത്തുന്നവർ വീട്ടിൽ വച്ചുതന്നെ മൊബൈൽ ഫോൺ ഉപയോഗിച്ച് മസ്റ്ററിംഗ് നടത്തുമെന്നും മന്ത്രി വ്യക്തമാക്കി. എല്‍പിജി സിലിണ്ടര്‍ ഉടമകള്‍ ഗ്യാസ് കണക്‌ഷന്‍ മസ്റ്ററിംഗ് നടത്തണമെന്ന കേന്ദ്രസര്‍ക്കാര്‍ ഉത്തരവ് വന്നതോടെ ഉപയോക്താക്കള്‍ക്ക് വലിയ പ്രയാസം സൃഷ്‌ടിച്ചിരുന്നു. തുടര്‍ന്ന് ഗ്യാസ് ഏന്‍സികള്‍ക്കു മുന്നില്‍ വലിയ ക്യൂവാണ് പ്രത്യക്ഷപ്പെട്ടുവന്നിരുന്നത്.
ആധാര്‍ പ്രാമാണീകരണം പൂര്‍ത്തിയായിട്ടില്ലെന്നു കരുതി ഒരു ഉപഭോക്താവിനും സേവനമോ ആനുകൂല്യങ്ങളോ നിഷേധിക്കില്ലെന്ന് പെട്രോളിയം- പ്രകൃതിവാതക മന്ത്രാലയം അറിയിച്ചു.
കൂടാതെ ഉപഭോക്താക്കള്‍ക്ക് തങ്ങളുടെ സൗകര്യത്തിന്‍റെ അടിസ്ഥാനത്തില്‍ ബന്ധപ്പെട്ട എല്‍പിജി വിതരണകേന്ദ്രങ്ങളിലെത്തിയും പ്രാമാണീകരണം പൂര്‍ത്തിയാക്കാം. അതോടൊപ്പം ബന്ധപ്പെട്ട എണ്ണക്കമ്പനികള്‍ ലഭ്യമാക്കിയിട്ടുള്ള മൊബൈല്‍ ആപ്പുകള്‍ വഴി സ്വന്തം നിലയിലും ഉപഭോക്താക്കള്‍ക്ക് പ്രാമാണീകരണ പ്രക്രിയ പൂര്‍ത്തിയാക്കാനാകുമെന്നും മന്ത്രാലയം അറിയിച്ചു.
നേരിട്ടുള്ള ആനുകൂല്യ കൈമാറ്റ പദ്ധതികള്‍ക്കുള്ള ആധാര്‍ അധിഷ്ഠിത പ്രാമാണീകരണം ഇരട്ടിപ്പോ ഡ്യൂപ്ലിക്കേഷനോ ഇല്ലാതെ ഗുണഭോക്താക്കള്‍ക്ക് കൃതവും യഥാസമയവും ആനുകൂല്യങ്ങള്‍ ലഭ്യമാക്കുന്നതിന് സഹായിക്കും.ഏകദേശം 55 ശതമാനം പിഎംയുവൈ ഉപഭോക്താക്കള്‍ ഇതിനകം തങ്ങളുടെ പ്രാമാണീകരണം പൂര്‍ത്തിയാക്കിയിട്ടുമുണ്ട്.
എല്‍പിജി ഉപഭോക്താക്കള്‍ക്ക് ഐഒസിഎല്‍ ആപ്, ബിപിസിഎല്‍ ആപ്, എച്ച്പിസിഎല്‍ ആപ് എന്നിവയിലൂടെ സ്വന്തം നിലയിലും പ്രാമാണീകരണം പൂര്‍ത്തിയാക്കാം. ഗൂഗിള്‍ പ്ലേസ്റ്റോറില്‍നിന്ന് ഈ ആപ്പുകള്‍ ഡൗണ്‍ലോഡ് ചെയ്യാം. സഹായത്തിന് എല്‍പിജി ഉപഭോക്താക്കള്‍ക്ക് എണ്ണ ഉത്പാദന കമ്പനികളുടെ ടോള്‍ഫ്രീ നമ്പറായ 1800 2333555ലും ബന്ധപ്പെടാം.