നഡ്ഡ രാജ്യസഭാ നേതാവ്
Tuesday, June 25, 2024 1:23 AM IST
ന്യൂഡൽഹി: കേന്ദ്ര ആരോഗ്യ, രാസവളം വകുപ്പ് മന്ത്രിയും ബിജെപി ദേശീയ അധ്യക്ഷനുമായ ജഗത് പ്രകാശ് നഡ്ഡയെ രാജ്യസഭയിലെ സഭാനേതാവായി നിയമിച്ചു. രാജ്യസഭയിലെ നേതാവായിരുന്ന കേന്ദ്രമന്ത്രി പിയൂഷ് ഗോയൽ ലോക്സഭാംഗമായതോടെയാണ് ജെ.പി. നഡ്ഡയുടെ നിയമനം.
കോണ്ഗ്രസ് ദേശീയ അധ്യക്ഷനായ മല്ലികാർജുൻ ഖാർഗെയാണ് രാജ്യസഭയിലെ പ്രതിപക്ഷ നേതാവ്. ഇതോടെ രണ്ടു പ്രധാന ദേശീയ പാർട്ടികളുടെ ദേശീയ അധ്യക്ഷന്മാർ ഒരേസമയം രാജ്യസഭയിൽ നേതാവും പ്രതിപക്ഷ നേതാവുമായ അപൂർവതയും കൈവന്നു.
ബിജെപി പ്രസിഡന്റ് പദവി ആറു മാസത്തിനുശേഷം ഒഴിയുമെങ്കിലും അതുവരെ രാജ്യസഭയിലെയും സർക്കാരിലെയും പാർട്ടിയിലെയും ചുമതലകളാകും നഡ്ഡയ്ക്കുള്ളത്.
പ്രധാനമന്ത്രി നരേന്ദ്ര മോദിയാണ് ലോക്സഭയുടെ നേതാവ്. ലോക്സഭാ പ്രതിപക്ഷ നേതൃസ്ഥാനം രാഹുൽ ഏറ്റെടുത്താൽ മോദിയും രാഹുലും തമ്മിൽ വാക്പോരിന് കളമൊരുങ്ങും.