സോണിയയില്ലാത്ത സഭയിൽ ഒന്നാം നിരയിൽ രാഹുൽ
Tuesday, June 25, 2024 1:23 AM IST
ന്യൂഡൽഹി: കോണ്ഗ്രസ് നേതാവും അമ്മയുമായ സോണിയ ഗാന്ധി ഇല്ലാത്ത 18-ാം ലോക്സഭയിൽ പ്രതിപക്ഷ ബെഞ്ചിലെ മുൻനിരയിൽ രാഹുൽ ഗാന്ധി. 17-ാം ലോക്സഭയിൽ സോണിയ ഗാന്ധിയും കോണ്ഗ്രസ് കക്ഷി നേതാവ് അധീർ രഞ്ജൻ ചൗധരിയുമായിരുന്നു മുൻനിരയിൽ.
ഇക്കുറി പ്രതിപക്ഷ നേതാവിനെ തീരുമാനിച്ചില്ലെങ്കിലും രാഹുൽ മുൻനിരയിൽ ഇരുന്നു. കോണ്ഗ്രസ് അംഗങ്ങൾ സത്യപ്രതിജ്ഞയ്ക്കുശേഷം രാഹുൽ ഗാന്ധിയെ അഭിവാദ്യം ചെയ്തു.
പ്രധാനമന്ത്രി നരേന്ദ്ര മോദിയും അമിത് ഷായും സത്യപ്രതിജ്ഞയ്ക്ക് എത്തിയപ്പോൾ രാഹുൽ ഗാന്ധിയുടെ നേതൃത്വത്തിൽ ഇന്ത്യ സഖ്യം നേതാക്കൾ ഭരണഘടന ഉയർത്തിപ്പിടിച്ചു പ്രതിഷേധിച്ചു.
രാഹുൽ ഗാന്ധിക്കൊപ്പം സമാജ്വാദി പാർട്ടി നേതാവ് അഖിലേഷ് യാദവ്, ഡിഎംകെ നേതാവ് എ. രാജ എന്നിവരും മറ്റു നേതാക്കളും ഇരുന്നു.