യോഗ ആഗോളനന്മയുടെ ശക്തമായ ഏജന്റ്: മോദി
Saturday, June 22, 2024 3:34 AM IST
ശ്രീനഗർ: ആഗോളനന്മയുടെ ശക്തമായ ഏജന്റായാണ് യോഗയെ ലോകം നോക്കിക്കാണുന്നതെന്നു പ്രധാനമന്ത്രി നരേന്ദ്ര മോദി.
പത്താമത് അന്താരാഷ്ട്ര യോഗ ദിനമായ ഇന്നലെ ശ്രീനഗറിലെ ദാൽ തടാകക്കരയിൽ യോഗയുടെ പ്രാധാന്യത്തെക്കുറിച്ചു സംസാരിക്കുകയായിരുന്നു മോദി. സന്പദ്വ്യവസ്ഥ മെച്ചപ്പെടുത്താൻ യോഗയ്ക്കു കഴിയും.
ജമ്മു കാഷ്മീരിൽ കൂടുതൽ വിനോദസഞ്ചാരികളെ ഇതുവഴി ആകർഷിക്കാനാകുമെന്നും മോദി കൂട്ടിച്ചേർത്തു. കേരളം, ഉത്തരാഖണ്ഡ് എന്നീ സംസ്ഥാനങ്ങളിൽ യോഗ ടൂറിസം വളർന്നുവരുന്നുണ്ട്.
വ്യക്തിവികാസത്തിനുള്ള ഉത്തമ മാർഗമായി യോഗയെ കാണണം. അതു സമൂഹനന്മയ്ക്കായി പ്രയോജനപ്പെടുത്തണമെന്നും ഷേർ-ഇ- കാഷ്മീർ ഇന്റർനാഷണൽ കൺവൻഷൻ സെന്ററിലെത്തിയവരോടായി മോദി പറഞ്ഞു.
മഴയെ അവഗണിച്ച് ഏഴായിരം പേരാണ് എത്തിയത്. യോഗാഭ്യസനത്തിനെത്തിയവർക്കൊപ്പം സെൽഫിയെടുത്താണ് മോദി മടങ്ങിയത്.