കേന്ദ്രസർക്കാരിനെ വിമർശിക്കുന്ന പോസ്റ്റുകൾ സമൂഹ മാധ്യമങ്ങളിൽനിന്ന് നീക്കുന്നതായി കോണ്ഗ്രസ്
Thursday, April 18, 2024 1:58 AM IST
ന്യൂഡൽഹി: സമൂഹ മാധ്യമങ്ങളിൽനിന്ന് കേന്ദ്ര സർക്കാരിനെ വിമർശിക്കുന്ന പോസ്റ്റുകൾ നീക്കംചെയ്യുന്നതായി കോണ്ഗ്രസ്. തെരഞ്ഞെടുപ്പ് കമ്മീഷനെതിരേ കോണ്ഗ്രസ് നേതാവ് സുപ്രിയ ശ്രിനേതാണ് ആരോപണമുന്നയിച്ചിരിക്കുന്നത്.
കേന്ദ്രസർക്കാരിനെ വിമർശിക്കുന്ന പോസ്റ്റുകൾ എക്സിൽനിന്ന് നീക്കം ചെയ്യപ്പെടുന്നു. ഇലക്‌ടറൽ ബോണ്ട്, വിലക്കയറ്റം, തൊഴിലില്ലായ്മ, കർഷക സമരം തുടങ്ങിയ വിഷയങ്ങളിലെ പോസ്റ്റുകളാണ് നീക്കംചെയ്യുന്നത്.
രാഷ്‌ട്രീയാവശ്യങ്ങൾക്കായി കേന്ദ്രസർക്കാർ സമൂഹ മാധ്യമങ്ങളെ വരുതിയിലാക്കിയിരിക്കുകയാണ്. ഇതിന്‍റെ തുടർച്ചയായാണ് ചില വിഷയങ്ങൾ സംബന്ധിച്ച് വരുന്ന പോസ്റ്റുകൾക്ക് സമൂഹ മാധ്യമത്തിൽ ഇടംകിട്ടുന്നില്ലെന്ന ആരോപണവുമായി കോണ്ഗ്രസ് രംഗത്തെത്തിയത്.