തുരങ്കത്തിനുള്ളിലെ 41 തൊഴിലാളികളും സുരക്ഷിതരാണെന്ന് കഴിഞ്ഞയാഴ്ച സ്ഥിരീകരിച്ചിരുന്നു. തുരങ്കത്തിനകത്തേക്ക് സ്ഥാപിച്ച കുഴലിലൂടെ എൻഡോസ്കോപിക് കാമറ കടത്തി തൊഴിലാളികളുടെ ദൃശ്യങ്ങൾ പകർത്താനായതും കുഴലിലൂടെ ഭക്ഷണസാധനങ്ങൾ തുരങ്കത്തിനുള്ളിലെത്തിക്കാനായതും തൊഴിലാളികളുമായി വോക്കിടോക്കികൾ വഴി ആശയവിനിമയം നടത്താനായതും കാര്യങ്ങൾ കൂടുതൽ എളുപ്പമാക്കി.
എങ്കിലും അവശിഷ്ടങ്ങൾക്കിടയിലൂടെ ഡ്രില്ലിംഗ് നടത്തുന്നതിനിടെ അമേരിക്കൻ ഓഗർ മെഷീന് സാങ്കേതികതകരാർ സംഭവിച്ചത് പലകുറി ആശങ്ക സൃഷ്ടിച്ചു. തുരങ്ക മുഖത്തുനിന്നുള്ള രക്ഷാദൗത്യത്തിനു പുറമെ മറ്റു നാലിടത്തുകൂടി ഡ്രില്ലിംഗ് നടത്തി തൊഴിലാളികൾക്കരികിലേക്ക് പൈപ്പിടാനുള്ള കർമപദ്ധതിയും രക്ഷാപ്രവർത്തകർ ആവിഷ്കരിച്ചിരുന്നു.