തെലുങ്കാനയിൽ വൈഎസ്ആർടിപി- കോണ്ഗ്രസ് സഖ്യനീക്കം
Tuesday, May 30, 2023 1:43 AM IST
ബംഗളൂരു: തെലുങ്കാനയിൽ കോണ്ഗ്രസുമായുള്ള സഖ്യനീക്കത്തിനുള്ള ശ്രമങ്ങൾ ഊർജിതമായിരിക്കേ വൈഎസ്ആർടിപി അധ്യക്ഷ വൈ.എസ്. ശർമിള ഇന്നലെ കർണാടക ഉപമുഖ്യമന്ത്രി ഡി.കെ. ശിവകുമാറുമായി കൂടിക്കാഴ്ച നടത്തി. ശിവകുമാറിന്‍റെ ബംഗളൂരുവിലെ വസതിയിലായിരുന്നു ഇരുവരും ചർച്ച നടത്തിയത്.
കർണാടകയിൽ കോണ്ഗ്രസിന്റെ വിജയത്തിൽ ശിവകുമാർ വഹിച്ച പങ്കിനെ നേരത്തെ ശർമിള ശ്ലാഘിച്ചിരുന്നു. ഡി.കെ. ശിവകുമാർ ഞങ്ങളുടെ കുടുംബവുമായി അടുത്ത ബന്ധമുള്ളയാളാണെന്നും തന്‍റെ പിതാവ് വൈ.എസ്. രാജശേഖർ റെഡ്ഢിയുടെ ഉറ്റ സുഹൃത്താണ് ശിവകുമാറെന്നും പിന്നീട് ശർമിള വ്യക്തമാക്കിയിരുന്നു.
കോണ്ഗ്രസും വൈഎസ്ആർടിപിയും തെലുങ്കാനയിൽ സഖ്യത്തിൽ മത്സരിക്കുന്നതു സംബന്ധിച്ചു മുന്പ് ചർച്ച നടന്നിരുന്നു. ഏതു പാർട്ടിയുമായും ചർച്ച നടത്താൻ സമ്മതമാണെന്നും കെ. ചന്ദ്രശേഖർ റാവുവിനെയും പാർട്ടിയെയും അധികാരത്തിൽനിന്നു പുറത്താക്കുകയാണു തങ്ങളുടെ ലക്ഷ്യമെന്നും ശർമിള പറഞ്ഞിരുന്നു.
ആന്ധ്രപ്രദേശ് മുഖ്യമന്ത്രി ജഗൻ മോഹൻ റെഡ്ഢിയുടെ സഹോദരിയായ ശർമിള തെലുങ്കാന കേന്ദ്രീകരിച്ചാണു പ്രവർത്തിക്കുന്നത്. ശർമിളയുടെ വൈഎസ്ആർടിപിക്ക് തെലുങ്കാനയിലെ ചില പ്രദേശങ്ങളിൽ സ്വാധീനമുണ്ട്. ബിആർഎസിനെതിരേ പ്രതിപക്ഷ വോട്ടുകൾ ഏകീകരിക്കുകയാണു ശർമിളയുടെ ലക്ഷ്യം.