ഗള്‍ഫ് മേഖലയില്‍ സഭയെ ശക്തിപ്പെടുത്താൻ കര്‍മപദ്ധതി ആവിഷ്‌കരിക്കും: മാര്‍ റാഫേൽ തട്ടില്‍
Sunday, December 1, 2024 1:42 AM IST
കൊച്ചി/ദുബായ്: ആഗോള സമുദായ ശാക്തീകരണം സഭയുടെ ലക്ഷ്യമാണെന്നും അതിനായി ലോകമെമ്പാടുമുള്ള സമുദായ അംഗങ്ങളെ കോര്‍ത്തിണക്കാന്‍ കത്തോലിക്ക കോണ്‍ഗ്രസ് മുന്‍കൈ എടുക്കണമെന്നും സീറോമലബാര്‍ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍. ദുബായില്‍ കത്തോലിക്ക കോണ്‍ഗ്രസ് ഗള്‍ഫ് റീജൺ ലീഡേഴ്‌സ് മീറ്റ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
സാമൂഹിക, സാമ്പത്തിക, സാംസ്‌കാരിക രംഗങ്ങളില്‍ സഭാംഗങ്ങളുടെ സഹകരണം സാധ്യമാക്കണം. മറ്റ് രാജ്യങ്ങളില്‍ കുടിയേറി പാര്‍ക്കുന്നവരെയും തൊഴില്‍ ബിസിനസ് രംഗങ്ങളിലുള്ളവരെയും വിദ്യാഭ്യാസത്തിനായി വിവിധ രാജ്യങ്ങളില്‍ എത്തുന്നവരെയും പരസ്പരം ബന്ധിപ്പിക്കാന്‍ കത്തോലിക്ക കോണ്‍ഗ്രസ് നേതൃത്വം വഹിക്കണം. ഗള്‍ഫ് മേഖലയില്‍ ആല്‍മീയ, ഭൗതിക വളര്‍ച്ചയ്ക്കായി പിന്തുണ ഉറപ്പാക്കാന്‍ സഭ കര്‍മപദ്ധതികള്‍ ആവിഷ്‌കരിക്കുമെന്നും മാര്‍ തട്ടില്‍ പറഞ്ഞു.
സമുദായ അംഗങ്ങളുടെ ഗ്ലോബല്‍ നെറ്റ്‌വര്‍ക്ക് രൂപീകരിക്കുമെന്ന് യോഗത്തില്‍ അധ്യക്ഷത വഹിച്ച കത്തോലിക്ക കോണ്‍ഗ്രസ് ഗ്ലോബല്‍ പ്രസിഡന്‍റ് രാജീവ് കൊച്ചുപറമ്പില്‍ പറഞ്ഞു. വികാരിയേറ്റ് ഓഫ് സതേണ്‍ അറേബ്യ ബിഷപ് മാര്‍ പൗലോ മാര്‍ട്ടിനെലി അനുഗ്രഹ പ്രഭാഷണവും ബിഷപ് മാർ റെമിജിയോസ് ഇഞ്ചനാനിയിൽ മുഖ്യപ്രഭാഷണവും നടത്തി.
ഗ്ലോബല്‍ ഡയറക്ടര്‍ റവ. ഡോ. ഫിലിപ്പ് കവിയില്‍, ജനറല്‍ സെക്രട്ടറി ഡോ. ജോസ്‌കുട്ടി ഒഴുകയില്‍, ഗ്ലോബല്‍ വൈസ് പ്രസിഡന്‍റുമാരായ ഡേവിസ് ഇടക്കളത്തൂര്‍, ബെന്നി പുളിക്കക്കര, ഫാ. ജിയോ കടവി, ഫാ. പി.എം. പീറ്റര്‍ എന്നിവര്‍ പ്രസംഗിച്ചു.