സ്ത്രീത്വത്തെ അപമാനിച്ചെന്ന്; ഒന്പതു പേർക്കെതിരേ കേസ്
Friday, October 11, 2024 1:33 AM IST
കൊച്ചി: സ്ത്രീത്വത്തെ അപമാനിച്ചുവെന്ന വനിതാ സിനിമാ നിര്‍മാതാവിന്‍റെ പരാതിയില്‍ കേസെടുത്ത് പോലീസ്. കേരള ഫിലിം പ്രൊഡ്യൂസേഴ്സ് അസോസിയേഷന്‍ ഭാരവാഹികളായ നിര്‍മാതാവ് ആന്‍റോ ജോസഫ്, ലിസ്റ്റിന്‍ സ്റ്റീഫന്‍, ബി. രാകേഷ് എന്നിവരുള്‍പ്പെടെ ഒന്പതു പേര്‍ക്കെതിരേയാണു കേസ്. പ്രത്യേക അന്വേഷണ സംഘത്തിനു നല്‍കിയ പരാതിയില്‍ എറണാകുളം സെന്‍ട്രല്‍ പോലീസാണ് കേസ് രജിസ്റ്റര്‍ ചെയ്തത്.
വനിതാ നിര്‍മാതാവിന്‍റെ ചിത്രങ്ങളുമായി ബന്ധപ്പെട്ട് അസോസിയേഷനുമായി ചില തര്‍ക്കങ്ങള്‍ നിലനിന്നിരുന്നു. ഇതിന്‍റെ ഭാഗമായി അസോസിയേഷന്‍ ഭാരവാഹികള്‍ ഈ നിര്‍മാതാവിനെ യോഗത്തിലേക്ക് വിളിച്ചുവരുത്തുകയുണ്ടായി. ഈ സമയത്ത് വനിതാ നിര്‍മാതാവ് ചില പരാതികള്‍ മുന്നോട്ടുവച്ചു. എന്നാല്‍, അടുത്ത യോഗത്തില്‍ ഇതു ചര്‍ച്ച ചെയ്തു പരിഹരിക്കാമെന്ന് അസോസിയേഷന്‍ ഭാരവാഹികള്‍ അറിയിച്ചു.
അടുത്ത യോഗത്തിലേക്ക് വനിതാ നിര്‍മാതാവിനെ വിളിക്കുന്നതിനിടെയാണ് ഹേമാ കമ്മിറ്റി റിപ്പോര്‍ട്ട് പുറത്തു വന്നത്. തുടര്‍ന്ന് വനിതാ നിര്‍മാതാവ് സമൂഹമാധ്യമങ്ങളിലൂടെ പരസ്യപ്രതികരണവുമായി രംഗത്തുവന്നു. ഇതേത്തുടര്‍ന്ന് പരസ്യപ്രതികരണത്തില്‍ വിശദീകരണം ആവശ്യപ്പെട്ടു അസോസിയേഷന്‍ കത്ത് നല്‍കി.
ഇതില്‍ വിശദീകരണം നല്‍കാനായി എത്തിയ യോഗത്തില്‍ വച്ച് അസോസിയേഷന്‍ ഭാരവാഹികള്‍ മോശമായി പെരുമാറിയെന്നാണു വനിതാ നിര്‍മാതാവിന്‍റെ പരാതി.
മാനസികമായി സമ്മര്‍ദം ചെലുത്തിയെന്നും സ്ത്രീത്വത്തെ അപമാനിക്കുന്ന തരത്തില്‍ പെരുമാറ്റമുണ്ടായെന്നും പരാതിയില്‍ പറയുന്നു.
നിര്‍മാതാക്കളുടെ അറസ്റ്റ് കോടതി തടഞ്ഞു
കൊച്ചി: വനിതാ ചലച്ചിത്ര നിര്‍മാതാവ് നല്‍കിയ മാനസിക പീഡന പരാതിയില്‍ നാല് നിര്‍മാതാക്കളുടെ അറസ്റ്റ് കോടതി തടഞ്ഞു.
പ്രൊഡ്യൂസേഴ്സ് അസോസിയേഷന്‍ ഭാരവാഹികളായ ആന്‍റോ ജോസഫ്, അനില്‍ തോമസ്, ബി. രാകേഷ് ഉള്‍പ്പെടെയുള്ളവർ ജാമ്യം തേടി സമര്‍പ്പിച്ച ഹര്‍ജിയിലാണ് അറസ്റ്റ് തടഞ്ഞ് ഉത്തരവായത്. എറണാകുളം പ്രിന്‍സിപ്പല്‍ സെഷന്‍സ് കോടതിയിലാണ് മുന്‍കൂര്‍ ജാമ്യാപേക്ഷ നല്‍കിയത്.