56.2 ശതമാനം കുടുംബങ്ങളെ അതിദാരിദ്ര്യത്തില്‍നിന്ന് മോചിപ്പിച്ചു സംസ്ഥാനത്ത് അതിദരിദ്രരായി കണ്ടെത്തിയ 64,006 കുടുംബങ്ങളില്‍ 56.2 ശതമാനം കുടുംബങ്ങളെ അതിദാരിദ്ര്യത്തില്‍നിന്ന് മോചിപ്പിക്കാന്‍ സാധിച്ചതായി മന്ത്രി എം.ബി. രാജേഷ്. അതിദാരിദ്ര്യം ലഘൂകരിക്കാന്‍ മൈക്രോ പ്ലാനാണ് സര്‍ക്കാര്‍ നടപ്പാക്കിയത്. ദാരിദ്ര്യഘടകം എന്താണെന്ന് കണ്ടെത്തിയാണ് ഇതിനുള്ള പരിഹാരം കണ്ടത്.
ഗ്രാമീണ തൊഴിലുറപ്പ് പദ്ധതി നഗരങ്ങളിലേക്കു കൂടി വ്യാപിപ്പിച്ച ആദ്യ സംസ്ഥാനമാണ് കേരളം. നഗര തൊഴിലുറപ്പ് പദ്ധതി കേരളം സമഗ്രമായി നടപ്പാക്കി. മറ്റ് പല സംസ്ഥാനങ്ങളും ഈ മാതൃക അനുകരിച്ചെങ്കിലും സമഗ്രമായില്ല. ഗ്രാമീണ തൊഴിലുറപ്പ് പദ്ധതി നടത്തിപ്പില്‍ കേരളം രാജ്യത്ത് ഒന്നാമതാണ്. പദ്ധതി നടത്തിപ്പിന്‍റെ നാല് ഘടകങ്ങളില്‍ കേരളം ഒന്നാമതും നാലില്‍ രണ്ടാം സ്ഥാനത്തുമാണെന്നും മന്ത്രി പറഞ്ഞു.
കെ ഫോണ്‍ 22,357 ഓഫീസുകളില്‍ കെ ഫോണ്‍ വഴി 22,357 ഓഫീസുകളില്‍ ഇതുവരെ ഇന്‍റര്‍നെറ്റ് കണക്‌ഷന്‍ നല്‍കിയതായി മുഖ്യമന്ത്രി പിണറായി വിജയന്‍ നിയമസഭയില്‍ പറഞ്ഞു. സാമ്പത്തികമായി പിന്നാക്കം നില്‍ക്കുന്ന 5833 വീടുകളില്‍ ഇതുവരെ കെ ഫോണ്‍ വഴി സൗജന്യമായി ഇന്‍റര്‍നെറ്റ് നല്‍കിയിട്ടുണ്ട്. 32,379 വാണിജ്യ കണക്‌ഷനുകളും നല്‍കി.
സംസ്ഥാനത്ത് ബെവ്കോ വഴി വില്‍ക്കുന്ന മദ്യത്തില്‍ ക്യുആര്‍ കോഡ് സംവിധാനം ഏര്‍പ്പെടുത്തുമെന്ന് മന്ത്രി എം.ബി. രാജേഷ് പറഞ്ഞു.