ഫെസ്റ്റിവലിന്‍റെ ഭാഗമായി സംഘടിപ്പിക്കുന്ന അന്താരാഷ്‌ട്ര അക്കാദമിക സമ്മേളനം കാലാവസ്ഥാവ്യതിയാനം, പരിസ്ഥിതി ജാഗ്രത, കർഷകരുടെയും ആദിവാസികളുടെയും ഉപജീവനാവകാശങ്ങൾ എന്നീ വിഷയങ്ങൾ ചർച്ച ചെയ്യും. ലണ്ടൻ കിംഗ്സ് കോളജ് പ്രഫ. ക്രിസ്റ്റോഫ് ജഫ്രലോട്ട് സമ്മേളനത്തിൽ മുഖ്യപ്രഭാഷണം നടത്തും.
പ്രശസ്ത ചരിത്രകാരനും എഴുത്തുകാരനുമായ ജോണ് കീ, നോവലിസ്റ്റും ന്യൂയോർക് വാസർ കോളജ് പ്രഫസറുമായ അമിതാവ കുമാർ, ഹാർവാർഡ് യൂണിവേഴ്സിറ്റി പ്രഫ. കരോലിൻ ബക്കി എന്നിവർ പങ്കെടുക്കും.
പുഞ്ചിരിമട്ടം ഉരുൾപൊട്ടൽ വയനാടിന്‍റെ മനസിലും കാർഷിക, വാണിജ്യ, വിനോദസഞ്ചാര മേഖലകളിലും വലിയ ആഘാതമാണ് സൃഷ്ടിച്ചത്. ജില്ലയിലേക്കുള്ള സഞ്ചാരികളുടെ വരവ് ഗണ്യമായി കുറഞ്ഞു. പ്രതിസന്ധിയിൽനിന്ന് വയനാടിനെ കരയേറ്റാനും സാധാരണജീവിതം സാധ്യമാക്കാനും സഹായകമാകുന്ന പദ്ധതികളെക്കുറിച്ചു സമൂഹം ഗൗരവമായി ചിന്തിച്ചുവരികയാണ്.
ഈ അവസരത്തിൽ വയനാട് ലിറ്ററേച്ചർ ഫെസ്റ്റിവൽ വ്യത്യസ്തമായ അനുഭവമാകുമെന്നാണ് പ്രതീക്ഷയെന്ന് ഡയറക്ടർ പറഞ്ഞു. സംഘാടക സമിതി രൂപീകരണ യോഗം ഒൻപതിന് വൈകുന്നേരം നാലിന് ദ്വാരക കാസാ മരിയയിൽ ചേരും.