നാവികസേനയ്ക്ക്‌ രണ്ട് അന്തർവാഹിനി കപ്പലുകൾകൂടി
Tuesday, September 10, 2024 1:48 AM IST
കൊച്ചി: നാവികസേനയ്ക്കുവേണ്ടി കൊച്ചി കപ്പൽശാല നിർമിച്ച രണ്ട് അന്തർവാഹിനി ആക്രമണ-പ്രതിരോധ കപ്പലുകൾ (ആന്‍റി സബ്മറൈൻ വാർഫെയർ ഷാലോ വാട്ടർ ക്രാഫ്റ്റ് – എഎസ്ഡബ്ല്യു എസ്ഡബ്ല്യുസി) നീറ്റിലിറക്കി.
ശത്രുസേനയുടെ അന്തർവാഹിനി സാന്നിധ്യം തിരിച്ചറിയാൻ സഹായിക്കുന്ന അത്യാധുനിക സോണാർ സംവിധാനം ഉൾപ്പടെയുള്ള പുതിയ കപ്പലുകൾ നാവികസേനയുടെ പ്രതിരോധസംവിധാനങ്ങളിലെ മികവുയർത്തുന്നതാണ്.
78 മീറ്റര്‍ നീളവും 11.36 മീറ്റര്‍ വീതിയുമുള്ള കപ്പലുകൾക്ക് പരമാവധി 25 നോട്ടിക്കൽ മൈൽ വേഗം കൈവരിക്കാൻ സാധിക്കും. നൂതന റഡാർ സിഗ്‌നലിംഗ് സംവിധാനമുള്ള സബ്മറൈൻ വാർഫെയർ ഷാലോ വാട്ടർ ക്രാഫ്റ്റുകൾ പൂർണമായും തദ്ദേശീയമായാണു നിർമിച്ചിട്ടുള്ളത്. പുതിയ കപ്പലുകൾ ഐഎൻഎസ് മാൽപേ, ഐഎൻഎസ് മുൾക്കി എന്നീ പേരുകളിൽ അറിയപ്പെടുമെന്ന് നാവികസേനാ അധികൃതർ വ്യക്തമാക്കി.
കഴിഞ്ഞ നവംബറിൽ ഐഎൻഎസ് മാഹി, ഐഎൻഎസ് മാൽവൻ, ഐഎൻഎസ് മാംഗ്രോൾ എന്നീ മൂന്ന് കപ്പലുകൾ കൊച്ചി കപ്പൽശാല നിർമാണം പൂർത്തിയാക്കി നീറ്റിലിറക്കിയിരുന്നു.
ഇന്നലെ കപ്പലുകൾ നീറ്റിലിറക്കുന്ന ചടങ്ങിൽ ദക്ഷിണ നാവികസേനാ ഫ്ലാഗ് ഓഫീസർ കമാൻഡിംഗ്-ഇൻ-ചീഫ് വൈസ് അഡ്മിറൽ വി. ശ്രീനിവാസ്, വിജയ ശ്രീനിവാസ്, കൊച്ചിൻ ഷിപ്‌യാർഡ് ചെയർമാൻ ആൻഡ് മാനേജിംഗ് ഡയറക്ടർ മധു എസ്. നായർ, ഡയറക്ടർമാർ, നേവിയുടെ മുതിർന്ന ഉദ്യോഗസ്ഥർ തുടങ്ങിയവർ പങ്കെടുത്തു.