ഭൂനിരപ്പില്‍നിന്നു താഴെ നിര്‍മിച്ചിരിക്കുന്ന ഡിഎല്‍എഫിലെ വലിയ ജലസംഭരണി മേയ് 27, 28 തീയതികളിലെ വെള്ളപ്പൊക്കത്തെത്തുടര്‍ന്ന് മലിനമായിരുന്നു. ഈ ഫ്ലാറ്റ് സമുച്ചയത്തിന്‍റെ തൊട്ടടുത്തുള്ള ദര്‍ശന്‍ നഗറില്‍ വെള്ളപ്പൊക്കദിവസങ്ങളില്‍ വീടുകള്‍ക്കുള്ളില്‍ വരെ വെള്ളം കയറിയിരുന്നു.
വിഷയം ഗൗരവമുള്ളത്; നടപടിയുണ്ടാകും: മന്ത്രി തിരുവനന്തപുരം/കൊച്ചി: കാക്കനാട് ഡിഎൽഎഫ് ഫ്ളാറ്റിൽ താമസിക്കുന്നവർക്കു വയറിളക്കവും ഛർദിയും ഉണ്ടായ സാഹചര്യം ഗൗരവമുള്ള വിഷയമാണെന്നും പൊതുജനാരോഗ്യ സംരക്ഷണ നിയമ പ്രകാരം തുടർനടപടികൾ സ്വീകരിക്കുമെന്നും ആരോഗ്യ മന്ത്രി വീണാ ജോർജ്.
ഇന്നലെയാണു ഫ്ളാറ്റിലെ ഒരാൾ നേരിട്ട് ഫോണിൽ വിളിച്ച് ഇക്കാര്യം അറിയിച്ചത്. ഉടൻതന്നെ ആരോഗ്യ വകുപ്പ് ഡയറക്ടറെ വിളിച്ച് അടിയന്തരമായി ഇടപെടാൻ നിർദേശം നൽകി. ആരോഗ്യ വകുപ്പിന്‍റെ പ്രത്യേക സംഘം സ്ഥലത്തെത്തി തുടർനടപടികൾ സ്വീകരിച്ചെന്നും മന്ത്രി പറഞ്ഞു.
ഫ്ളാറ്റിലെ കുടിവെള്ളത്തിന്‍റെ എല്ലാ സ്രോതസുകളും പരിശോധിക്കും.
രോഗബാധിതരായ വ്യക്തികൾ പല ആശുപത്രികളിൽ ചികിത്സ തേടിയത് കൊണ്ടായിരിക്കാം ഈ വിഷയം ആരോഗ്യവകുപ്പിന്‍റെ ശ്രദ്ധയിൽപ്പെടാത്തത്. അക്കാര്യവും അന്വേഷിക്കും. പ്രദേശത്ത് ബോധവത്കരണം ശക്തിപ്പെടുത്തും. തിളപ്പിച്ചാറ്റിയ വെള്ളം മാത്രമേ കുടിക്കാൻ പാടുള്ളൂ എന്നും മന്ത്രി അഭ്യർഥിച്ചു.
കുടിവെള്ളത്തിന്‍റെ സാമ്പിള്‍ പരിശോധനയ്ക്ക് അയച്ചു ആരോഗ്യവകുപ്പ് ഉദ്യോഗസ്ഥര് കുടിവെള്ളത്തിന്‍റെ സാമ്പിള്‍ ശേഖരിച്ച് പരിശോധനയ്ക്ക് അയച്ചിട്ടുണ്ട്. സംസ്ഥാന ആരോഗ്യവകുപ്പിന്‍റെയും തൃക്കാക്കര നഗരസഭ ആരോഗ്യ വിഭാഗത്തിന്‍റെയും നിരീക്ഷണം ഫ്ലാറ്റിലും സമീപ പ്രദേശങ്ങളിലും ഏര്‍പ്പെടുത്തി.
വരുംദിവസങ്ങളില്‍ കൂടുതല്‍ പരിശോധനകളും ക്ലോറിനേഷന്‍ അടക്കമുള്ള നടപടികളും ഉണ്ടാകും. ഡിഎംഒ ഡോ.കെ. സക്കീനയുടെ നേതൃത്വത്തില്‍ ഉന്നതതല യോഗം ചേര്‍ന്നു സ്ഥിതിഗതികള്‍ വിലയിരുത്തി.