മദ്യനയത്തിൽ ജനവിരുദ്ധ നിലപാടുകള് സ്വീകരിക്കരുത്: മാര് തെയോഡോഷ്യസ്
Wednesday, June 19, 2024 1:31 AM IST
കൊച്ചി: മദ്യനയ രൂപീകരണത്തില് ജനവിരുദ്ധമായ നിലപാടുകള് സര്ക്കാര് സ്വീകരിക്കരുതെന്ന് കെസിബിസി മദ്യവിരുദ്ധ കമ്മീഷന് ചെയര്മാന് ബിഷപ് യൂഹാനോന് മാര് തെയോഡോഷ്യസ്.
കെസിബിസി മദ്യവിരുദ്ധ സമിതി നേതൃയോഗം പാലാരിവട്ടം പിഒസിയില് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.
മദ്യപരുടെ മദ്യാസക്തിയെന്ന ബലഹീനതയെ വരുമാനം കൂട്ടാൻ സര്ക്കാരും മദ്യക്കച്ചവടക്കാരും ചൂഷണംചെയ്യരുത്. സംസ്ഥാനത്തെ മദ്യ ഉപയോഗത്തിന്റെ കോടിക്കണക്കിന് രൂപയുടെ തോത് വെളിപ്പെടുത്തുന്നവര് മദ്യാസക്തി മൂലം തകര്ന്ന കുടുംബങ്ങളുടെയും വ്യക്തികളുടെയും യഥാര്ഥ കണക്കുകള്കൂടി പുറത്തുവിടണം. മദ്യനയം ജനദ്രോഹപരമായാല് എതിര്ക്കുമെന്നും നേതൃയോഗം മുന്നറിയിപ്പു നൽകി.
സംസ്ഥാന സെക്രട്ടറി പ്രസാദ് കുരുവിള അർധവാര്ഷിക പദ്ധതി അവതരിപ്പിച്ചു. കമ്മീഷന് സെക്രട്ടറി ഫാ. ജോണ് അരീക്കല് അധ്യക്ഷത വഹിച്ചു.
ഭാരവാഹികളായ വി.ഡി. രാജു, ആന്റണി ജേക്കബ് ചാവറ, സി.എക്സ്. ബോണി, അന്തോണിക്കുട്ടി ചെതലന്, സിബി ഡാനിയേല്, ടി.എസ്. ഏബ്രഹാം, എ.ജെ.ഡിക്രൂസ്, മേരി ദീപ്തി, റോയി മുരിക്കോലില് എന്നിവര് പ്രസംഗിച്ചു.