ഓട്ടോയില് ഓട്ടം തുടരാന് കേരള കോണ്ഗ്രസ്
Wednesday, June 19, 2024 1:31 AM IST
കോട്ടയം: കോട്ടയം ലോക്സഭാ തെരഞ്ഞെടുപ്പിലെ വിജയചിഹ്നമായ ഓട്ടോറിക്ഷ ഔദ്യോഗിക ചിഹ്നമായി അംഗീകരിച്ച് കേരള കോണ്ഗ്രസ് പാർട്ടി.
ഉന്നതാധികാര സമിതിയുടെ തീരുമാനമനുസരിച്ച് സ്ഥിരം ചിഹ്നമായി ഓട്ടോറിക്ഷ അനുവദിക്കണമെന്നാവശ്യപ്പെട്ട് ചെയര്മാന് പി.ജെ. ജോസഫ് കേന്ദ്ര തെരഞ്ഞെടുപ്പ് കമ്മീഷനെ സമീപിക്കും.
കേരള കോണ്ഗ്രസുകളുടെ വിവിധ പിളര്പ്പുകളില് ആന, കുതിര, സൈക്കിള് തുടങ്ങിയ ചിഹ്നങ്ങളാണ് പലപ്പോഴായി ജോസഫ് വിഭാഗത്തിനുണ്ടായിരുന്നത്.
അവസാന പിളര്പ്പിലെ തര്ക്കത്തിലും വ്യവഹാരത്തിലും രണ്ടില കേരള കോണ്ഗ്രസ് -എമ്മിന് അനുകൂലമായി കോടതി വിധിയുണ്ടായി. കോട്ടയത്ത് യുഡിഎഫ് സ്ഥാനാര്ഥിയായ ഫ്രാന്സിസ് ജോര്ജിന് വൈകിക്കിട്ടിയ ചിഹ്നം ഓട്ടോറിക്ഷ വരും തെരഞ്ഞെടുപ്പുകളിലും ഔദ്യോഗികമാക്കാനാണ് തീരുമാനം.