കോടതിവരാന്തയില്‍ പോലീസുകാരന് അഭിഭാഷകന്‍റെ ഭീഷണി
Wednesday, September 27, 2023 6:18 AM IST
കൊച്ചി: കോടതിവരാന്തയില്‍ പോലീസുകാരനുനേരേ അഭിഭാഷകന്‍റെ ഭീഷണി. പോലീസിന്‍റെ വയര്‍ലസ് സെറ്റ് എറിഞ്ഞുടച്ച കേസിലെ പ്രതിയായ അഭിഭാഷകന്‍ തിരുവനന്തപുരം സ്വദേശി മുഹമ്മദ് ഷെഹിനാണ് ജില്ലാ കോടതിയില്‍ എ.പി. ഡ്യൂട്ടിക്കെത്തിയ എറണാകുളം നോര്‍ത്ത് സ്റ്റേഷനിലെ സിവില്‍ പോലീസ് ഓഫീസറായ സജിമോനെ ഭീഷണിപ്പെടുത്തിയത്.
കഴിഞ്ഞ ദിവസം എറണാകുളം നോര്‍ത്ത് സിഐയുടെ വയര്‍ലസ് സെറ്റ് എറിഞ്ഞുടച്ച കേസില്‍ അഭിഭാഷകനെ പോലീസ് അറസ്റ്റ് ചെയ്തു ജാമ്യത്തില്‍ വിട്ടിരുന്നു. ഇന്നലെ രാവിലെ എറണാകുളം ഫസ്റ്റ് ക്ലാസ് എസിജെഎം കോടതി വരാന്തയില്‍ വച്ചായിരുന്നു സംഭവം.
അഡീഷണല്‍ പബ്ലിക് പ്രോസിക്യൂട്ടര് ഇക്കാര്യം ജഡ്ജിയെ അറിയിക്കുകയും പോലീസുകാരനില്‍നിന്ന് പരാതി എഴുതി വാങ്ങാന്‍ ജഡ്ജി ആവശ്യപ്പെടുകയുമായിരുന്നു. അഭിഭാഷകന്‍ ഭീഷണിപ്പെടുത്തിയ സംഭവം പോലീസുകാരന് എറണാകുളം നോര്‍ത്ത് സിഐയെ അറിയിച്ചു. പരാതി നല്‍കാന്‍ സിഐ പോലീസുകാരന് നിര്‍ദേശം നല്‍കുകയായിരുന്നു.