കെഎസ്യു മാർച്ചിൽ കല്ലേറ്, ലാത്തിച്ചാർജ്
Tuesday, September 26, 2023 6:33 AM IST
കളമശേരി: കൊച്ചി സർവകലാശാലയിലേക്ക് കെഎസ്യു നടത്തിയ പ്രതിഷേധ മാർച്ചിനെ തുടർന്ന് പോലീസ് നടത്തിയ ലാത്തിച്ചാർജിൽ അഞ്ചു പേർക്ക് പരിക്ക്. സമരക്കാരുടെ കല്ലേറിൽ കളമശേരി പോലീസ് ഇൻസ്പെക്ടർ വിബിൻദാസ് കുഴഞ്ഞുവീണു. പ്രതിഷേധക്കാരായ എട്ടുപേരെ കളമശേരി പോലീസ് അറസ്റ്റ് ചെയ്തു.
കുസാറ്റ് മുൻ എസ്എഫ്ഐ നേതാവ് പി.കെ.ബേബിയുടെ നിയമനത്തെക്കുറിച്ചും നിയമനത്തിന് പുറകിലുള്ളവരെക്കുറിച്ചും അന്വേഷിക്കണമെന്ന് ആവശ്യപ്പെട്ട് കുസാറ്റ് അമിനിറ്റി ഹാളിന് സമീപത്തുനിന്ന് കുസാറ്റ് അഡ്മിനിസ്ട്രേറ്റീവ് ഓഫീസിലേക്ക് ആയിരുന്നു കെഎസ്യു ജില്ലാ കമ്മിറ്റിയുടെ മാർച്ച്. മാർച്ച് പ്രധാന ഗേറ്റിന് സമീപം പോലീസ് തടഞ്ഞു.
അസിസ്റ്റന്‍റ് പോലീസ് കമ്മീഷണർ പി.വി.ബേബിയുടെയും കളമശേരി പോലീസ് ഇൻസ്പെക്ടർ വിബിൻദാസിന്‍റെയും നേതൃത്വത്തിൽ വൻ പോലീസ് സന്നാഹം സ്ഥലത്തുണ്ടായിരുന്നു. സമരക്കാർ ബാരിക്കേഡ് മറിച്ചിടാൻ ശ്രമിച്ചതോടെ പോലീസ് ജലപീരങ്കി പ്രയോഗിച്ചു. സമരക്കാർ കൂട്ടംകൂടി നിന്ന് ജലപീരങ്കിയെ പ്രതിരോധിച്ചു.