കൊലക്കേസിലെ റിമാൻഡ് പ്രതി മരിച്ചു
Monday, June 5, 2023 12:31 AM IST
തൃശൂർ: വിയ്യൂർ സബ് ജയിലില്‍ കൊലക്കേസില് റിമാൻഡിൽ കഴിഞ്ഞിരുന്ന പ്രതി മരിച്ചു. തൃശൂര്‍ ചെറുതുരുത്തി കോഴിമാംപറമ്പ് സ്വദേശി ഷിയാദ് (40) ആണു മരിച്ചത്.
ഇന്നലെ അർധരാത്രി 12ന് ഷിയാദിനു ശാരീരിക അസ്വസ്ഥത ഉണ്ടായിരുന്നു. തുടർന്ന് ജയിൽ അധികൃതർ തൃശൂർ മെഡിക്കൽ കോളജിൽ എത്തിച്ചു. അപ്പോഴേക്കും മരണം സംഭവിച്ചിരുന്നു. കഴിഞ്ഞ മാര്‍ച്ച് ഒന്നിനാണു ഷിയാദ് റിമാന്‍ഡിലായത്.
മദ്യപാനത്തെത്തുടർന്നുണ്ടായ തർക്കത്തിൽ സുബ്രഹ്മണ്യൻ എന്നയാളെ തലയ്ക്കടിച്ചു കൊലപ്പെടുത്തിയ കേസിലെ പ്രതിയാണു ഷിയാദ്. പിന്നാലെ പോലീസ് ഇയാളെ അറസ്റ്റ് ചെയ്യുകയായിരുന്നു. ഷിയാദിന്‍റെ മൃതദേഹം മെഡിക്കല്‍ കോളജ് മോര്ച്ചറിയിലേയ്ക്കു മാറ്റിയിരിക്കുകയാണ്.