ഷാരൂഖ് സെയ്ഫിയെ എൻഐഎ വീണ്ടും ചോദ്യം ചെയ്തേക്കും
Saturday, June 3, 2023 1:52 AM IST
തൃശൂര്‍: കണ്ണൂര്‍ ട്രെയിന്‍ തീവയ്പു കേസ് പ്രതിയെ വിയ്യൂര്‍ അതീവസുരക്ഷാ ജയിലില്‍ കഴിയുന്ന എലത്തൂര്‍ കേസിലെ പ്രതി ഷാരൂഖ് സെയ്ഫിക്ക് അറിയുമോ എന്ന കാര്യം എന്‍ഐഎ സംഘവും പോലീസും അന്വേഷിക്കുന്നു.
ഇതുമായി ബന്ധപ്പെട്ട് എന്‍ഐഎ സെയ്ഫിയെ വീണ്ടും വിശദമായി ചോദ്യംചെയ്തേക്കും. ട്രെയിന്‍ തീവയ്പ് കേസുകളിലെ രണ്ടു പ്രതികള്‍ എന്ന നിലയിലാണ് ഇരുവരും തമ്മില്‍ എന്തെങ്കിലും ബന്ധമുണ്ടോയെന്ന് അന്വേഷണസംഘം പരിശോധിക്കുന്നത്.
ചോദ്യംചെയ്യുന്നതിനിടെ സെയ്ഫി പറഞ്ഞ ചില കാര്യങ്ങള്‍ എന്‍ഐഎ സംഘത്തെ ചില സംശയങ്ങളിലേക്കു നയിച്ചിരുന്നു. എലത്തൂര്‍ കേസുമായി ബന്ധപ്പെട്ട ചോദ്യം ചെയ്യലിനിടെ സെയ്ഫി നല്‍കിയ മൊഴികളിലൊന്നാണ് അന്വേഷണ സംഘത്തെ സംശയത്തിലാഴ്ത്തിയിരിക്കുന്നത്.
താനല്ലെങ്കില്‍ മറ്റൊരാള്‍ അതു നടത്തുമെന്ന സെയ്ഫിയുടെ പരാമര്‍ശം കണ്ണൂര്‍ തീവയ്പു കേസുമായി ബന്ധപ്പെടുത്തിയാണ് അധികൃതർ പരിശോധിക്കുന്നത്. സെയ്ഫി ഈ മൊഴിക്ക് തുടര്‍വിശദീകരണം നല്‍കിയതുമില്ല.
അതിനിടെ, എലത്തൂര്‍ കേസിലെ പ്രതി ഷാരൂഖ് സെയ്ഫിയെ പ്രത്യേക കോടതി രണ്ടാഴ്ചത്തേക്കുകൂടി റിമാന്‍ഡ് ചെയ്തു. പ്രതിഭാഗത്തിന്‍റെ ആവശ്യപ്രകാരം പ്രതിയുടെ മാനസിക, ശാരീരിക ആരോഗ്യനില വിദഗ്ധരടങ്ങിയ മെഡിക്കല്‍ ബോര്‍ഡിനെക്കൊണ്ടു പരിശോധിപ്പിക്കും. രണ്ടു മാനസികാരോഗ്യ വിദഗ്ധര്‍ അടക്കം നാലു ഡോക്ടര്‍മാര്‍ സംഘത്തിലുണ്ടാവണം. കടുത്ത വയറുവേദന അനുഭവപ്പെടുന്നതായി ഷാരൂഖ് പരാതിപ്പെട്ടിരുന്നു.