ബസുകളിൽ കാമറ ഘടിപ്പിക്കൽ ജൂൺ 30 വരെ നീട്ടി
Sunday, April 2, 2023 12:58 AM IST
ചാത്തന്നൂർ: സംസ്ഥാനത്തെ ബസുകളിൽ കാമറ ഘടിപ്പിക്കാനുള്ള തീയതി നീട്ടി നൽകി ഗതാഗത വകുപ്പ് .
ബസുകളിൽ കാമറ ഘടിപ്പിക്കാനുള്ള സമയപരിധി ജൂൺ 30 വരെയാണ് ദീർഘിപ്പിച്ചത്. നേരത്തേ മാർച്ച് 31 വരെയായിരുന്നു കാമറകൾ ഘടിപ്പിക്കാൻ സമയം നൽകിയിരുന്നത്. റൂട്ട് ബസുകളുടെ മത്സരയോട്ടം മൂലമുള്ള വാഹനാപകടങ്ങൾ നിയന്ത്രിക്കാൻ ബസുകളുടെ അകത്തും പുറത്തും കാമറ സ്ഥാപിക്കാൻ സർക്കാർ നിർദേശം നൽകിയിട്ടുണ്ട്.
ബസുകളിൽ ഘടിപ്പിക്കാൻ നിലവാരമുള്ള കാമറകളുടെ ദൗർലഭ്യം നേരിട്ടിരുന്നു. കൂടാതെ, കൂടുതൽ കാമറകൾ ആവശ്യമായി വന്നപ്പോൾ കമ്പനികൾ അമിത വിലയാണ് ഈടാക്കിയത്. ഈ ചൂഷണം ശ്രദ്ധയിൽപ്പെട്ടതിനെ തുടർന്നാണ് സമയപരിധി വീണ്ടും ദീർഘിപ്പിച്ചത്. ഇതിനുപുറമേ, കെഎസ്ആർടിസിയുടെ ടെൻഡർ നടപടികൾ പൂർത്തിയാക്കാൻ കൂടുതൽ സമയം ആവശ്യമായതും സമയപരിധി കൂട്ടാൻ കാരണമായി.
വിദ്യാഭ്യാസ സ്ഥാപനങ്ങളുടെ ബസുകൾക്കും കോൺടാക്ട് കാരിയേജുകൾക്കും കാമറ നിർബന്ധമാക്കാൻ തീരുമാനിച്ചിട്ടുണ്ട്.